Kakuwang sa koryente

Daghan ang nahibulong kun ngano nga ang Visayan Electric Company magdumili man pagpalit og koryente gikan sa Korean Electric Corporation-Salcon Power Corporation nga anaa sa Naga City.

Wala malilong kanato nga ang Sugbo nagkuwang g’yod og suplay sa koryente ug mao man gani kini ang rason nga kun dunay planta nga maguba sa National Power Corporation nga maoy tinubdan karon sa koryente sa Veco – masinati g’yod nato ang brown-out.

Apil ko nahibulong kun nganong nagdumili man ang Veco sa pagpalit og koryente gikan sa Kepco-SPC nga kuwang pa man ang ilang koryente alang sa konsumo dinhi sa ato.

Nasabot hinoon nako nga tungod tingali kini kay ang Aboitiz Power Corporation nga maoy tag-iya sa Veco nakig-joint venture man sa usa ka langyaw’ng kompaniya aron magtukod og laing power plant adto sa Toledo.

Buyno, katungod man usab nila ang pagnegosyo. Kun operational na ang maong coal-fired power plant sa Toledo nga panag-iyahon sa Aboitiz ug sa Global Business Power Corporation, mahimong adto na lang sila magkuha og suplay sa koryente.

Apan mentras tanto tingali nga wala pa kini mahingpit pagtukod – kay unya pa man kuno kini mahuman sa 2010 – mas maayo tingali nga mopalit lang sila’g koryente gikan sa Kepco-SPC kun magkasabot sila sa presyo.

Sa ingon nga paagi, sigurado nga dili magkuwang ang atong suplay sa koryente unya ilabi na kun duna nay dakung panginahanglan sa koryente inig-operate na sa kompaniya sa Atlas sa Toledo.

Tiaw mo, ang Atlas Mining sa Toledo magkinahanglan man g’yod og dakung suplay sa koryente. Kun mahitabo kini, dili imposible ang kanunay’ng brown-out unya.

Pagka karon, ang Kepco-SPC naproblema kay kun mopugos sila sa pag-operate, mahimong maalkanse sila kay wala may mopalit sa ilang koryente. Nasayod na kita nga dinhi sa Metro Cebu, ang Veco maoy atong leading power distributor.

* * *

Paita niining mga tawo nga kunohay moabag pagpahapsay sa dagan sa mga sakyanan diha sa atong kadalanan, apan maisip ra nga mga “pahoy sa humayan” kay mora’g walay kabangkaagan sa ilang trabaho.

Usa niini mao kanang mga tanod man tingali na nga magbantay sa eskena Gorordo Avenue ug Salinas Drive sa barangay Lahug, apan mora’g mga buta nga wala makakita nianang mga motorsiklo nga anha iparking sa karsada.

Ang gipasabot nako mao kanang karsada – dapit sa tuo sa dayon na nga tungas paingon sa Marco Polo Hotel sa barangay Busay. Ang tukma nga mga traffic enforcers mao kadtong mobadlong sa mga makabalda sa pag-agi sa mga sakyanan.

Nanagsiga lang ang ilang mga mata nga nagtan-aw sa daghang motorsiklo nga gigamit isip “habal-habal” nga anaa gipang-parking sa karsada ug nakabalda sa pag-agi sa mga sakyanan.

Gawas sa mga motor, wala usab nila badlonga ang mga passenger jeepney nga mihimo sa usa ka “lane” sa karsada isip ilang mga terminal nga anha sila magpaabot og pasahero.

Wala ba gayod moabot sa inyong kaisipan nga ang gihimo sa maong mga abusadong drayber maoy makapahinay sa pagsibog sa mga sakyanan diha sa maong dapit?

Siyaro na man usab og wala g’yod kini mosantop sa inyong utok uy! Tungod kay mabalda man ang pagdagan sa mga sakyanan diha sa maong dapit, hinay kaayo ang pagsibog sa mga sakyanan gikan sa Gorordo Avenue.

Mabantayan g’yod kini nako kay niining ulahing mga adlaw, kanunay ko nga moagi diha sa maong dapit. Awhagon nako si Lahug barangay captain Mary Ann delos Santos nga aksyonan niya kining maong obserbasyon.

* * *

Makapanglingo-lingo g’yod ko nga magbasa sa mga disisyon sa korte sa mga kaso nga naglambigit sa gidiling drugas nga ang akusado giabswelto sa huwes kay wala tumana sa polis ang tukmang pagdakop.

Tinuod, walay lalis nga ang akusado ibutang nato nakuhaan gayod og ebidensya nga illegal nga drugas. Apan ang maong mga illegal nga drugas dili magamit nga ebidensya aron sila konbiktohon.

Ngano man? Una, ang polis mobutyag sa hukmanan nga ila rang gipangrekisa ang akusado bisan og wala nila kini madakpi. Mahimo lang dakpon ang usa ka tawo bisan og walay warrant of arrest basi sa lagda nga gilatid sa section 5, Rule 113 sa Rules on Criminal Procedures.