Fight diay gihapon

Wala g'yod diay makatulog si Lorega-San Miguel barangay captain Fortunato Parawan sa naangkon niyang kapildehan sa miaging barangay elections.

Protestahan g'yod diay ni kapitan Parawan ang iyang kapildehan sa miaging eleksyon.

Ako siya nga gisukna pinaagi sa text message kun unsa katinuod ang nadawat nako nga mga tabi-tabi. Gikonpirmar ni Parawan nga mosang-at siya og election protest.

Kun unsay iyang mga argumento sa protesta, wala pa nako mahibaw-i hangtud sa pagsuwat nako niining maong lindog.

Mora'g kapin sa 100 ka botos ang biya ni Parawan sa botos nga nakuha sa iyang No 1 councilor nga si Lorenzo "Larry" Monsanto.

Ambot, nganong nausab ang baruganan ni kapitan Parawan. Kun atong ibutang nga magmalampuson siya sa protesta - unya dili na makalingkod si elected barangay captain Monsanto - ang mopuli sa pagka kapitan dili gihapon si Parawan.

Basi sa balaod ang mopuli pagka kapitan mao man ang numero uno nga konsehal ug dili ang pildero nga mipasaka og protesta

Kun ako pa ni kapitan Parawan, huwata na lang ang sunod nga eleksyon. Kombinsiha ang katawhan nga maayo ka nga modumala sa barangay aron botahan ka.

Parte sa pinalitay og botos atol sa eleksyon kun kini ang gamitong argumento ni kapitan Parawan, dili na maayo nga tukion pa niya kini pag-ayo.

Ako hinoon, napilde g'yod sa miaging eleksyon kay tinarong man ang ako. Wala ko manghatag og T-shirt ug labaw pa nga wala mamalit og botos mao nga pilde ko.

Sagdi na lang. Maoy pag-ingnon, "charge to experience." Moserbisyo gihapon kita sa barangay kun kinahanglanon ang atong serbisyo.

* * *

Wala nay mga karne gikan sa laing lugar nga tugotang makasulod ug mabaligya dinhi sa dakbayan sugod karong Nobiyembre 15 kun kini giihaw sa mga ihawan nga dili accredited sa National Meat Inspection Service.

Angay lang. Ang mga karne god nga giihaw gikan sa mga walay klarong ihawan, dili nimo masiguro nga kini luwas ba nga kan-on sa mga tawo.

Sagad niini wala mahiling sa mga meat inspectors sa wala pa kini maihaw.

Ang mga meat inspectors makaila kun ang baboy dunay sakit mao nga kadtong masakiton dili tugotan nga maihaw.

Ang sagad god nga gihimo mao nga dunay mga baboy nga giihaw lang diha sa luyo sa panimalay, unya itumod dinhi sa dakbayan.

Apan bisan pa og ang mga karne giihaw sa ihawan diha sa Talisay City dili gihapon kini matugotan nga mabaligya dinhi sa dakbayan kay ang ihawan sa Talisay City dili accredited sa NMIS.

Nasuta ni city veterinarian Alice Utlang nga daghan sa mga karne nga gibaligya diha sa kamerkadohan sa dakbayan sa Sugbu gikan sa Talisay City.

Kun ang taga Talisay ug ubang lugar gustong mobaligya og karne dinhi sa dakbayan sa Sugbu, kinahanglan ang ilang mga baboy anha nila ipaihaw sa ihawan sa dakbayan sa North Reclamation Area.

* * *

Sa unang adlaw nako pagbalik sa korte kagahapon, nabantayan na usab nako ang sama gihapon nga rason nganong maabswelto ang usa ka dinakpan nga suspetsado paghupot og drugas.

Una, ang walay klaro nga pag-custody sa drugas nga makuha gikan sa dinakpan. Tiaw mo, hasta ang mga kaubang polis dili sigurado nga nakita nila ang ilang kauban nga misakmit sa drugas gikan sa suspetsado.

Unya, mao ra gihapon nga rason sa kapolisan nga ang dinakpan ilang naaktohan nga maghiling-hiling sa pakete sa shabu diha sa iyang palad bisan duol na ang mga polis kaniya.

Labaw pa nga nagduha-duha pagtoo ang hukmanan kay ang polis nga miangkong maoy nakasakmit sa shabu mitug-an nga ilado siya sa maong dapit nga diin nadakpi ang suspetsado kay daghan na siya og dinakpan sa nanglabay'ng mga buwan.

Kun mao kini, dakung imposible nga ang akusado plastada nga naghiling-hiling sa paketeng shabu sa iyang palad nga duol kaniya ang polis?

Dili ko moingon nga wala magtug-an sa tinuod ang mga polis, apan naabswelto ang akusado tungod sa ilang mga sipyat sa pagpanubag dihang miatubang sila sa korte.

Pagbantay g'yod mo kay si RTC judge Gabriel Ingles maayo kaayo na nga maminaw sa inyong mga testimonya.

Usa siya sa mga huwes diha sa RTC nga maayo kaayong mohan-ay ug mopasabot nganong makonbikto ug nganong maabswelto ang akusado.