Angayng panaminan

Sukad sa pagkatukod niadtong Nobyembre 25, 2000, ang Association of Concerned Texters (ACT) nahimo nang tinuorayng institusyon sa pangalagad sa Sugbo ug kasilinganang mga lalawigan. Ambot pila ra sa gatosan nga nanambong sa labing unang tigom sa kahugpongan ang nagdahom nga ang pundok nga nagsugod isip kiatkiat lang sa kasagarang batan-ong texters molahutay ug mahingpit sa iyang pagpakabana, di na lang alang sa texting kon dili, ug labi na, sa pagtubag sa labing dinaliang mga panginahanglan sa labing tabanganan nga mga hut-ong sa katilingban.

Di na kaayo batan-on ang nahibiling mga sakop sa ACT apan ang ilang kabaskog ug kadasig pagtuman sa ilang mga gimbuhaton lisod malabwan. Bisan sa nahiagomang daghang pagsuway sa kahugpongan, nagpabilin silang lig-on ug nagkahiusa ug matinud-anon sa pagtampo sa ilang panahon, kahago ug bisan ilang panudlanan alang sa labing kabos nga mga sakop sa katilingban.

* * *

Ang kamatinabangon sa ACT sa medical missions sa labing kabos nga mga barangay, relief campaigns sa mga biktima sa sunog sa Sugbo, landslide sa Guinsaugon ug Jagna ug ubang community outreach projects sa DYAB Abante Bisaya ug ABS-CBN Cebu mao ray nahibaw-an sa kadaghanan. Wa makit-i ang kaugalingong mga kalihokan sa ACT sama sa pagpakaon sa labing kabos nga mga bata, tibuok adlaw nga pakig-uban sa mga tiguwang nga wa nay mga pamilya, pagpananom og bakhaw, pagpakasal sa naglisod nga mga magtiayon, pagpabunyag sa kabos nga kabataan ug daghan pang uban.

Ang labing talagsaon mao nga nahimo sa ACT ang tanan niyang mapuslanong kalihokan nga wa sila magpakilimos sa mga politiko ni magpagamit sa bisan unsang patigayon. Silay labing unang mangabot, silay labing uwahing mamiya ug silay labing andam sa tanang kalihokan nga among gipasiugdahan-ingon niana kamatinud-anon ang ilang pagpakabana ug kalunsay ang ilang pagtabang.

Ning ika-unom nilang sumad, angayng yukboan ang ACT ug himuong panig-ingnan sa ubang katawhan nga nangandoy sang makatabang sa nasud ug sa katawhan. Di nila mahaw-as ang tanan gikan sa ilang katimawa, ni maluwas ang tanang masakiton ug gipanggutom, labing seguro di nila matarung ang kagamhanan ni makab-ot ang kalibotanong kalinaw, apan wa ning kapawong sa tinguha sa ACT paghikap ug paghimong mas sayon sa pipila ka kinabuhi.

* * *

Tuguting ako sang pahalipayan ang mga haligi sa KBP Cebu Chapter sa tuig 2007 nga napili sa General Membership Meeting niadtong Biyernes: Si Edward Abad (ABC 5) nasublian sa ikatulong termino isip chairman; silang Bong Aznar (RPN 9), Carlo Dugaduga (Aksyon Radyo) ug Marlon Baula (Hot FM) maoy vice chairmen; si Jose Lanza (Love Radio) ang secretary; si Debra Go (UR 109) maoy treasurer; si Dodi Conejero (Charlie FM) ang auditor; si Eulogio Jimenez (IBC 13) maoy PRO; si Manny Galicia (Home Radio) director; ug si Atty. Cynthia Barte (RMN) ang legal counsel.

* * *

Email:[email protected]