Buslot sa hustisya

Kamatayon pinaagi sa bitay ang sentensiya sa Iraqi High Tribunal batok ni Saddam Hussein ug laing duha ka sinumbong tungod sa nahimong krimen batok sa ilang kaugalingong katawhan. Samtang gikahadlokang manggubot ang mga dumadapig sa kanhi diktador sa Iraq ning iyang pagka-konbikto, gipaabot nga makatabang ang sangpotanan sa husay ni US Pres. George Bush ug sa mga kandidato sa Republican Party nga nagkapuliki pagpanagang sa mga protesta sa mga botante tungod sa nisamot nga duguong kaguliyang nga padayong nikalas sa mga kinabuhi sa Amerikanhong mga sundawo pila ka tuig human sa pag-atake ni Bush sa Iraq.

Tungod sa iyang pagsalikway sa mga pasidaan nga ang Iraq mahimong bag-ong Vietnam, si Bush nagkarakara karon pagpangita og kalutsan aron nga makalayas na siya sa Iraq nga di mauwawan sa di pa moulbo ang gikahadlokang gubat tali sa nagkasungi nga mga tribu ug sa di pa mahimong pabilo ang Iraq sa mas bangis nga pangatake sa mga terorista sa nagkalainlaing bahin sa kalibotan.

* * *

Bisan gikuwestiyon sa mga abogado ni Saddam ang kamakiangayon sa husay sa hukmanan nga gitukod sa bag-ong kagamhanan sa Iraq, ang paspas nga sangpotanan sa husay makapahinumdom sa mga Pilipinhon, sa makausa pa, sa masulub-ong kahimtang sa atong sistema sa hustisya.

Ang bangis nga mga krimen sa lapad nga pagpangawat ug pangabuso sa tawhanong katungod nga gipasangil batok sa diktadura ni anhing Ferdinand Marcos wa pa gyod mahusay hangtod karon, kawhaan na ka tuig human siya napalagpot. Wa pay bisan usa sa mga sakop sa iyang pamilya ug mga itoy nga nabusog pag-ayo atol sa mahariharion niyang pamunoan ang nabalhog sa bilanggoan.

Ang uban gani hinuon niyang mga alyado nagtungkawo na pagbalik sa gahom ug padayon na sang nangawkaw sa nasudnong katigayonan. Ang pipila sa nasakmit niyang katigayonan gipangawat ra sab sa mga nakapuli sa gahom.

* * *

Bisan ang pakisusi sa nahaunang kamatayon ni Benigno "Ninoy" Aquino Jr., nga maoy nahimong pabilo sa pagkapukan sa dikatadurang Marcos napakyas pag-ila sa utok sa bangis nga krimen. Ang mas bag-ong kasong plunder, nga nagtangag sab og silot sa kamatayon, batok ni kanhi presidente Joseph Estrada gikabalak-ang mahiagom sab sa way kinutobang kalangay tungod sa politikanhong mga maniobra.

Mas alaot ang kinabag-an sa katawhan nga way ikasuhol og banggiitang mga abogado pagtabang sa ilang kutas nga pagbugtaw sa hustisya. Di sila sama kabantogan nilang Marcos, Aquino ug Estrada ug busa ang ilang mga kaso nahiagom og mas makalilisang nga kalangay.

* * *

Nakapait kay way gihimo ang kagamhanan pagtapak sa dakong buslot sa hustisya. Hinunoa gisakyan ang kahuyang sa sistema aron pagpanglaktod pagpatay ug paghasi sa ilang mga kaatbang ug paghadlok sa kinabag-an nga wa nang kaagwanta sa inhustisya ug katimawa.

Tungod sa ilang pagkahubog sa gahom, ang mga namunoan klarong nakalimot unsay nahitabo sa mga diktadura nilang Saddam ug Marcos.

* * *

Email:[email protected]