Linigwatay sa SC?

Sa kataposan, human sa upat ka buwan nga kutas nga pagpinaabot, makapanumpa na gyod ang mga nakapasar sa kontrobersiyal nga nursing licensure examination (NLE) niadtong Hunyo ning tuiga. Ang Court of Appeals (CA) nihawan na gyod sa agianan sa pagpatuman sa ilang hukom nga ang 1,687 nga nangahagbong sa pasulit apan giinat ang grado ug gipapasar sa Professional Regulation Commission (PRC) mao ray mokuha pagbalik sa Test 3 ug 5 nga maoy naduhig sa leakage.

Ang bugtong makababag sa oath-taking mao na lang ang dinaliang pagpanginlabot sa Korte Suprema pinaagi sa pagluwat og temporary restraining order (TRO). Apan kon di magunok ang labawng hukmanan, kansang mga maghuhukom gikatakdang mamakasyon na, makapanumpa na gyong kapin sa 15,000 ka board passers ug makakuha na sa ilang lisensya ang gatosan nga nakapanumpa na sa wa pa luwati ang 60 ka adlaw nga TRO sa CA. Ug hinaot nga ang Malakanyang di lang magpatara. Maningkamot gyong kasilotan ang mga utok sa leakage aron hingpit nang katak-opan ang eskandalo.

* * *

Bisan sa Korte Suprema bantang ang pamolitika. Samtang daghan ang nakugang sa baruganan ni Chief Justice Artemio Panganiban, kay usa man siya sa nipaluyo sa people's initiative atol sa pamunoan sa iyang gisundan nga si kanhi chief justice Hilario Davide Jr., di lisod ipatin-aw ang iyang pagbalitok kay moretiro na siya karong tuiga ug mas dako ang iyang tinguha pagbilin og maayong kadungganan kay sa pagbayad og utang kabubut-on sa pagtudlo ni Pres. Arroyo niya sa labing taas nga katungdanan sa labawng hukmanan. Ang duha ka higpit nga karibal ni Panganiban-silang Associate Justices Reynato Puno ug Leonardo Quisumbing-pulos nipabor sa charter change. Segun sa usa ka batan-ong abogada sa Sugbo di ni tungod sa ilang pagdumot ni Panganiban ni sa pagbilib sa mga argumento sa mga turutot sa administrasyon kon dili aron pag-posisyon nang daan sa ilang kaugalingon samtang si Pres. Arroyo og itudlo puli ni Panganiban unya sa Disyembre.

* * *

Ambot gituyo ba o wa, si Panganiban nahisama ni Davide: Bisan sa pangligwat nga hilabihan, ilang gitalikdan ang mga presidente nga nagtudlo nila sa katungdanan alang sa gituohang mas dakong kaayuhan sa mas daghan. Si Davide maoy nipataop sa kataposang lansang sa lungon sa pamunoan ni kanhi presidente Joseph Estrada pinaagi sa pagpapanumpa ni Pres. Arroyo human nilayas si Erap gikan sa Malakanyang agi sa suba sa Pasig. Samtang si Arroyo nga maoy nakapahimus sa kontrobersiyal nga hukom ni Davide gitalikdan sang Panganiban pinaagi sa pagbasura sa usa sa mga panagang nga gidangpan sa presidente aron makalingkawas gikan sa maisugong kampanya pagpalagpot niya sa palasyo human nabisto ang daghang ebidensiya sa iyang paglubag sa sangpotanan sa eleksiyong presidensiyal sa 2004.

Samang Davide, makapataas si Panganiban sa iyang agtang sa hingpit nga pagpanamilit sa hukmanan.

* * *

Email:[email protected]