Gamay'ng kalipay

Sigurado ko nga ang gimando nga P18 nga usbaw sa minimum nga sweldo alang sa mga kawani sa pribadong sektor dinhi sa Metro Cebu wala kaayo makahatag og dakung kalipay sa mga mamumuo.

Aw, hinoon, maarang-arang na lang kon itandi sa wala na lang g'yoy usbaw sa sweldo. Apan lahi ang panglantaw sa mga magpapatigayon kay sila gidak-an na sa maong usbaw sa sweldo.

Kon imong kwentahon, tag P540 lang ang gimando nga usbaw alang sa minimum nga suholan sa mga dagkong kompaniya sa Metro Cebu ug ubos-ubos nga usbaw sa ubang dapit sa Central Visayas.

Abi ninyo og nganong nakaingon ko nga minus ra og epekto ang gihatag nga usbaw sa sweldo? Maut-ot ra gihapon ang maong usbaw tungod sa kamahal na karon sa presyo sa mga baligya.

Kini maoy kuhai og basihanan. Ang usa ka "brand" sa gatas sa miaging tuig, tag P558 pa ang 900 grams, apan karon gibaligya na kini sa kantidad nga tag P660.

Ang ako usab nga paboritong pan diri sa grocery sa silingan namong department store, kaniadto tag P18 ang usa, apan karon P25 na. Basta kay ang presyo sa tanang palaliton miumento g'yod.

Kon imong tibuk-on ang tanang umento sa mga palaliton, ang gihatag nga usbaw dili pa igo nga motumpak sa magasto nimo tungod sa kamahal na sa mga palitonon.

Unya, ang pangutana pila ra kaha sa mga nagdumala og negosyo ang mopatuman sa usbaw?

Nasayod ra ba kita nga ang kadagkoan sa Department of Labor and Employment maayo lang sa sulti apan wala g'yoy nahimo aron pagpugos sa daghang agawon aron mohatag og tukmang sweldo sa ilang kawani.

Akong klarohon ha, dili mapugos paghatag og dugang usbaw sa sweldo kadtong mga kompaniya nga naghatag na og sweldo sa ilang kawani nga subra sa P243 ang adlaw.

Apan hinoon, kadtong mga buotang agawon - sama sa mga Gullas ug Belmonte - nga maoy tag-iya sa Freeman-Philippine Star, wala usab hikawi kon mohatag sila og usbaw sa sweldo sa ilang mga kawani.

Dili man god panghambog, kaming mga kawani sa Freeman, ilabi na kadtong mga naghupot og igo-igo nga katungdanan gihatagan man og sweldo nga doble pa sa minimum nga suholan.

Apan ang mga kawani sa Freeman-Philippine Star, naghinam-hinam nga ang among president ug chief executive officer nga si Miguel Belmonte mohatag na usab og "good news" atol sa among pagsaulog sa pagkamugna sa Freeman karong adlawa.

Dihang ang Regional Tripartite Wages and Productivity Board mimando og P15 nga usbaw sa sweldo niadtong hinapos sa 2004, si Sir Miguel mihatag og mas subra pa sa maong gimando sa balaod.

Mao nga karong adlawa, nagpaabot kami nga si Mr. Miguel "Good News" Belmonte mohatag og mas daku pa nga usbaw kay sa gimbut-an sa balaod --- kana kon sugdan na niya pagpatuman ang kamandoan.

Apan luyo sa pagmando og dugang usbaw sa sweldo sa mga kawani ug sa grabeng pag-usbaw sa presyo sa mga palaliton, mapaabot nato nga modaghan ang mawagtangan og trabaho.

Abi ninyo og ngano? Duna g'yoy mga balay-patigayon nga manirado kay dili na makaabot pagsweldo og daghang mga kawani tungod kay dili ikalimod nga hinay ang ubang mga negosyo.

Sa ato pa, daku kaayo ang posibilidad nga may mga agawon nga manaktak og kawani - gawas lang kon ang maong mga kawani mouyon nga dili lang sila mangayo'g usbaw sa sweldo.

Kon ang maong mga kawani walay usbaw sa ilang sweldo unya mahal na kaayo ang palaliton, magpasabot nga dunay mga panginahanglanon nila nga dili na mapalit.

Sa laktud nga pagkasulti --- pait.

* * *

Ang pagpang-aspalto sa atong kadalanan dinhi sa dakbayan, makatampo gayod pagsulbad sa problema sa trapiko. Nasuta nako kini kagahapon dihang nag-uwan-uwan dinhi sa dakbayan.

Sama diha sa dalan Escario diin lapad na kaayo ang karsada kay ang pag-aspalto giabot man ngadto sa daplin, ang mga sakyanan mahimo na nga mopadaplin pag-agi.

Ang tambag lang nako sa mga sakop sa City Hall demolition team nga kon mahuman-human na og aspalto, ayaw mo pagduka nga mataligam-an ninyo ang pagbantay sa mga mobutang og mga tindahan sa daplin.

Usahay ra ba, daw sa nagduka lang ning mga sakop sa City Hall demolition team. Resulta, nagkagubot ang atong aseras sa mga illegal vendors.