Bata gibasura

Gipanghimakak sa Civil Service Commission (CSC) nga duna silay gipaboran sa ilang pagpanggukod sa mga opisyal sa kagamhanan nga di qualified sa mga katungdanan nga ilang gihuptan. Matud ni CSC 7 Regional Director David Cabanag Jr. ang tanang mga ahensiya naapil sa audit nga padayon nilang gihimo.

Mao ni iyang panagang sa pasangil nga samtang giinitan nila ang pipila, sama ni General Manager Adelberto Yap sa Mactan-Cebu International Airport Authority (MCIAA), wa sila mangahas pagtandog ni Regional Director Rogelio "Jingjing" Osmeña sa Land Transportation Franchising and Regulatory Board (LTFRB).

Si Cabanag nitug-an sa DYAB Abante Bisaya nga apil ang LTFRB sa mga ahensiya nga ilang gi-audit. Apan di pa siyang kasulti kon tinuod bang wa maghupot sa gikinahanglang civil service eligibility si Osmeña hangtod nga mahingpit paghukngay ang mga dokumento nga nahipos sa ilang audit team.

* * *

Usa sa labing unang nasugamak sa audit sa CSC mao si Regional Director Alex Leyson sa Land Transportation Office (LTO 7). Nasakpan nila si Leyson nga, sama ni Yap, way civil service eligibility. Sama ni Yap, si Leyson nidalidali pagkuha sa pasulit sa CSC. Lahi ni Yap, si Leyson nakapasar sa pasulit karong bag-o. Apan duna siyay mas dakong atraso.

Nabisto sa audit sa CSC nga ang appointment ni Leyson gikan ni Pres. Arroyo napupos na diay niadto pang 2004 ug hangtod karon wa pa kini malab-as. Tungod ini, giawhag ni Cabanag si Leyson sa pagpahawa sa labing daling panahon sa katungdanan. Kay bisan pila pa ka eligibility ang iyang gihuptan, di siya makapabilin sa katungdanan nga wa siya itudlo. Nangagpas si Cabanag nga wa na magtagad ang Malakanyang pagtudlo pagbalik ni Leyson tungod sa kakuwang niya sa eligbility ug ubang mga panginahanglan.

Samtang nagdumili si Leyson pagkanaog, gitambagan na sa CSC ang Commission on Audit (COA) ug ubang mga ahensiya sa di pag-ila sa mga transaksiyon nga iyang gisudlan.

* * *

Basaha ni og hilak. Batang lalaki nga bag-o pa lang gipakatawo gituohang buhi pa nga giputos sa iyang kaugalingong inahan og plastic nga grocery bag, gisud sa gamay'ng kahon sa lampin ug gitam-ok sa basurahan sa Barangay Pusok duol sa buhatan sa Social Security System (SSS) sa Lapu-Lapu City. Naukayan sa usa ka basurero ang patay'ng lawas sa bata alas-6 gahapon sa buntag maong nagduda ang kapolisan nga kadlawon siyang gipanganak.

Nagduda ang kapolisan nga ang inahan naa ra magpuyo duol sa basurahan. Maong ilang gisuhid ang kabalayan kinsay ilang silingan nga nagsabak nga nagluya o wa na pakita. Mahimong wa na lang magtagad ang inahan pagbilin sa iyang anak sa simbahan o sa tugkaran sa pinuy-anan tungod sa kahadlok nga makit-an.

* * *

Email: leo_lastimosa@abs-cbn.com