Teroristang may ID

Si Koronel Pablo Labra, hepe sa Criminal Intelligence and Investigation Bureau (CIIB), nahibung nganong nagda og hingpit nga identification papers ang duha ka gidudahang terorista nga napatay sa kapolisan human sa giingong pagbutang nilag bomba sa SM City. Matod ni Labra kasagaran sa mga terorista nga dunay tahas sa pagpamomba ug ubang matang sa terorismo di magda og bisan unsang dokumento nga makaila niya ug sa iyang pundok.

Apan lahi silang Ali Usop, alyas Datu Ismael "Alex" Usop ug Datu Niel Ulama, alyas Victor Ulama Zimenez, nga gipasanginlan sa kapolisan nga mga sakop sa Rajah Solaiman Revolutionary Movement. Sama sa rifle grenades nga giingong ilang gibilin sa ganghaan sa SM City, ang duha kuwang na lag dyutay nga mangamay sa kapolisan aron pagsegurong mapatay ug mailhan sila.

* * *

Atol sa iyang pagtambong sa Kapamilya Media Forum sa DYAB Abante Bisaya ug Sky Cable, ang bugtong katin-awan nga nahunahunaan ni Labra sa wa magkadimaong lihok sa gidudahang mga terorista mao ang kakuwang nilag kaubanan. Matod ni Labra nga ang pagpabilin sa duha sa atbang sa SM City bisan nangabot nang daghang kapolisan mahimong nagpasabot nga wa silay mga kauban nga makapabilin aron pagtino nga makabuto ang mga bomba.

Mas katuohan ang pangagpas ni Cebu City Mayor Tomas Osmeña, bisan tuod nga napaso ug nauwawan siya sa pagdayon og deklarar nga mga terorista ang Indonesian nationals nga nadakpan sa iyang paboritong barangay sa Guadalupe, nga nagpraktis lang ang gidudahang mga terorista sa mas dakong pagpamomba nga gilarawng himuon atol sa ASEAN summit karong Disyembre.

* * *

Nahadlok hinuon kong pulos sayop ang pangagpas nilang Labra ug Osmeña. Nagduda ko nga limtanon lang gyod ang duha nada ang mosunod nga mga dokumento nga nakuha gikan sa ilang mga patayng lawas:

• Si Usop giingong dunay ID sa SM Supermall sa kaulohan, tiket sa barko gikan sa Manila paingon sa Iloilo, Cagayan de Oro ug Sugbo, phone cards, SIM pack ug listahan sa mga numero; samtang

• Si Ulama dunay ATM card sa LBP, moneycard sa RCBC, papel nga dunay sketch ug laing papel nga dunay ngan ug numero.

* * *

Duol sa ilang mga patayng lawas, nakuha ang duha ka Pistola, 32 ka buhing mga bala, 21 ka kabhang sa bala ug usa ka Granada. Diin man nila ibilin ang peligro nilang bagahe kon tinuod ang sulti sa mga saksi nga napangutana sa kapolisan nga nanud pang duha sa mall sa wa pa biyai ang kahon nga gisudlan sa duha ka rifle grenades?

Nakabuylo nang imbestigasyon sa Commission on Human Rights labot sa panghitabo. Hinaot nga matubag nila ang kaliboan ug usa ka kalibogang mga pangutana sa di pa sila malinga ug mahigot sa mosunod nga mga kontrobersiya.

* * *

Email: [email protected]