Si Garci kita?

Si kanhi Comelec Commissioner Virgilio Garcillano nitapos sa iyang lima ka buwan nga pagtagutago di aron pagpanalipod sa iyang ngan. Kon mao pa nay iyang tuyo, maisugon unta dayon niyang giatubang ug gitubag ang mga pasangil nga usa siya sa nagmaniobra pagtikas sa eleksiyon sa niaging tuig pabor ni Pres. Arroyo. Si Garcillano niatubang sa Kongreso di aron pagluwas sa iyang kadungganan. Kon mao pa nay iyang tuyo, wa unta magpagamit paglabay og lapok sa mga kaatbang sa presidente.

Inay molusad og determinadong paningkamot pagpanagang sa tanang mga pagdaot ug pakauwaw batok niya, si Garcillano nigamit hinuon sa nangalisbo niyang ngan ug nadunot na niyang kadungganan aron pagduhig ug paghukas sa kaligdong sa tanang nangahas pagbarug pagpasangil sa presidente. Tungod ini, klaro unsay tinuod nga tuyo sa iyang pagawas ug kansang interes ang iyang gipanalipdan.

* * *

Ang tanang sulti ug postura ni Garcillano sa iyang pag-atubang sa mga kongresista di mao ang pagtin-aw kon dili pagsamot paglubog sa kontrobersiya. Ang gilapdon sa pakauwaw nga gipanghilam-os ni Garcillano maoy labing lig-ong tilimad-on nga di si Garcillano lang ang nagplano sa iyang pagtingog. Maong inay panalipdan ang iyang kaugalingon-bisan para na lang sa iyang mga anak ug mga apo kay di man ikalimod ang kahinog na sa iyang pangedaron-si Garcillano nisawom sa dugang lang-og nga tunaan sa pagpangilad ug pamakak.

Gipamatud-an ni Garcillano nga, sama sa iyang gihimo sa eleksiyon sa 2004, takos gihapong motuman sa lisod nga tahas nga gisangon ngadto niya. Pero bisan sa kataas sa iyang kasinatian di gyod tingali sayon ang pagtago sa kamatuoran. Kay si Garcillano nagluya human sa tibuok adlaw nga pagpanagang sa mga pangutana ug nigamit ini pagbalibad sa pagdapit sa mas-maayong-mangutana-ug-mas-lisod-lutsan nga mga senador.

* * *

Ang mas subo nga kamatuoran mao nga ang dagway ni Garcillano nahimong simbolo sa pait nga kahimtang sa kinabag-an sa katawhang Pilipinhon-way laing kapilian gawas sa pagpagamit para sa gamhanang mga interes nga maoy gisaligan sa ilang panginabuhi ug kaugmaon. Lisod tingaling toohan nga may konsiyensiya pa si Garcillano, pero ang kamatuoran mao nga wa siyay laing kapaingnan. Uwahi nang tanan, ihaw ang iyang padulngan kon maghilas-hilas pa pagtul-id sa taas na kaayong kutay sa iyang kasaypanan.

Nga mao say nahiagoman sa kinabag-an sa katawhan. Ang managkaluhang kagutom ug kaburong maoy nakahimo nilang ulipon sa mga nagtungkawo sa gahom. Bahala na kon ang mga politiko maoy responsable sa padayong paglubong sa katawhan sa lawom nga gahong nga ilang nahimutangan, ang mga botante mapugos pagduko ug pagpaawot nila. Bahala na nga bisan matambalan kadiyot ang kahapdos sa ilang tiyan, mosamot kahugot sa talikala sa ka way paglaom.

* * *

Email: [email protected]