Hadlok sa Senado

Naklaro na nganong gihimo ni Presidente Gloria Macapagal-Arroyo ang tanang desperadong maniobra-apil nang pagpresentar og pekeng mga saksi ug mga ebidensiya, pagpanuburno sa mga kongresista ug pagpanghudlat sa mga nakaako pagbarug batok niya-aron lang malaktod pagbasura ang tanang impeachment complaints batok niya. Gawas sa nag-ung-ong niyang pagtambong sa General Assembly sa United Nations, ang mas dakong hinungdan mao ang kahadlok nga ihawon siya sa mga senador kon dunay mapahigayon nga impeachment trial.

Si House Speaker Jose de Venecia maoy nibisto sa ilang baraha. Matod niya ang mayoriya sa mga senador nga gipangulohan ni Senate President Franklin Drilon determinado nang mokondenar sa presidente, gani sa way pupanagana bisan sa kahigayonan nga mahimo silang senator-judges niawhag sila para sa resignasyon ni Presidente Arroyo. Nipasidaan si de Venecia nga ang pagpada sa articles of impeachment ngadto sa Senado segurong makagusbat sa nasud.

* * *

Nakawang ang pagbakwi ni kanhi presidente Corazon Aquino sa iyang nahaunang baruganan paglikay sa protesta sa kadalanan ug pagtoo nga mapugos si Presidente Arroyo pag-resign pinaagi lang sa iyang pagdason sa awhag sa nagkalainlaing grupo sa mga politiko ug mga negosyante. Uwahi nang iyang pagkuyog sa martsa sa mga grupo nga iyang gilikayan kaniadto aron pagkuhit sa konsiyensiya sa mga kongresista paghatag og higayon nga mahusay ang impeachment complaint batok sa presidente.

Pero di hingpit nga mausik ang pagbalik ni Aquino sa kadalanan. Ang iyang presensiya maoy makatapak sa dakong haw-ang nga nahiagoman sa liderato sa kampanya pagpalagpot ni Presidente Arroyo: Ang kakuwang sa kaligdong. Labaw hinuon sa ilang panagkuyog, silang Aquino, Susan Roces, mga lider sa oposisyon ug militanteng mga grupo angayng mopresentar ngadto sa publiko sa hiniusa ug katoohan nga alternatibo kon mapalayas na si Arroyo.

* * *

Bisan sa mga pangangkon nga suportahan siya sa ubang kongresista sa Sugbo, si Kongresista Clavel Asas-Martinez mao ray maisugong nibarug para sa impeachment. Nagpabilin uban sa presidente silang Antonio Cuenco, Raul del Mar, Red Durano ug Eduardo Gullas.

Silang Simeon Kintanar ug Nerissa Soon-Ruiz niisnab sa awhag sa ilang padrino nga si kanhi senador John Osmeña. Sa iyang bahin, si Antonio Yapha, ambot tungod ba kay klaro nang pilde o nakumbinser sang laos na si Osmeña, wa pakita sa Kongreso bisan gibalik-balik pagtawag ang iyang ngan.

* * *

Kuwestiyonable nang daan ang pagdawat sa mga obispo sa Simbahang Katoliko sa nangalisbong kuwarta sa mga sugal sa Pagcor, mas kuwestiyonable ang lubay nilang reaksiyon sa pagluok sa impeachment proceedings nga maoy ilang giduso nga mas makiangayong alternatibo sa laktod nga resignasyon sa presidente.

Ang Pagcor maoy nibisto sa ngan nilang Arsobispo Ricardo Cardinal Vidal ug kaubanan. Gi-blackmail ba sila o gipasidan-an lang nga di maghilas-hilas? Bisan unsa pay motibo, nahadlok kong nilampos nang administrasyon pagapos sa mga prinsipe sa simbahan.

* * *

Email: [email protected]