Kurog sa tape

Bisan pa og magusbat sa Malakanyang ang kaligdong sa tanang saksi nga ipresentar sa oposisyon, magpabilin ang higanteng pagduda sa ka-lehitimo sa mandato ni Presidente Gloria Macapagal-Arroyo kon dili matubag ang labing lig-on nga ebidensiya batok sa administrasyon: Ang tulo ka oras nga audio recording nga naglakip sa labing menos 15 ka panag-istorya sa presidente ug ni kanhi Comelec Commissioner Virgilio Garcillano nga nagbisto sa pagmaniobra sa resulta sa eleksiyon sa niaging tuig ginamit ang Comelec, militar, kapolisan ug ang kinatibuk-ang makinarya sa gobyerno.

Kay bisan sa mga pagsuway pagpahiyos sa importansiya sa Garci tapes, (1) nga di krimen ang pakig-istorya sa presidente sa opisyal sa Comelec, (2) nga di magamit ang tapes isip ebidensiya kay ilegal nga nakuha, ug (3) nga gi-doktoran ang inosenteng mga istorya aron lang pagduot sa presidente, nipasulabi gyod ang abunda, katoohan ug imposibleng ma-maniobra nga detalyadong kasayuran nga nitakdo sa mga panghitabo sa mga adlaw nga nahimo ang panag-istorya niadtong Mayo ug Hunyo sa niaging tuig.

* * *

Maong di ikahibung nga naabtan ang administrasyong Arroyo og duha ka buwan human sa pag-ulbo sa eskandalo sa pagpresentar og eksperto nga nideklarar sa audio recording nga "inusab." Ug di baratuhon ang eksperto nga ilang gisandigan. Si Barry Dickey, ang tagduma sa Audio Evidence Lab sa Arlington, Texas, maoy usa sa nag-authenticate sa labing unang tape ni Osama bin Ladin.

Segun sa iyang website, www.audioevidencelab.com, si Dickey usa ka certified forensic expert, kansang trabaho naglakip sa audio-video authentication, digital enhancement/restoration, voice identification/elimination, analysis sa acoustic/visual media, ug transcription sa audio/video recordings.

Ginamit ang labing modernong DSP technology, analytical equipment ug microscopic resolution, ang labing inilang mga kaso ni Dickey nasibya sa CBS, Fox News, Forensic Files ug Science Frontiers sa The Learning Channel.

* * *

Pero ang exposé ni DENR Secretary Mike Defensor napandol dayon dihang si Kongresista Gilbert Remulla nga maoy nagduma sa imbestigasyon sa Garcia tapes ni Atty. Allan Paguia ug sa gitawag nga "mother of all tapes" ni kanhi NBI deputy director Samuel Ong, niingon nga wa mangayo si Defensor og kopya sa recordings nga gihuptan sa lima ka mga komitiba sa Kongreso. Nangutana si Remulla kon di ba pinalit gikan sa Quiapo ang kopya ni Defensor.

Bisan unsa kamaayong laki si Dickey, ma-kuwestiyonable gihapong iyang findings kon basura ang gilawog ni Defensor sa iyang laboratoryo. Ug kon gusto gyong administrasyon nga mabisto ang kamatuoran, nganong duha ra man ka tracks, nga nilungtad lag pipila ka segundos, ang ilang gipahiling ni Dickey?

Atubangan sa dinalidali nga pag-usab ni Press Secretary Ignacio Bunye sa recording nga una ni niyang gi-warawara niadtong Hunyo 6, kuwang pa bang duha ka buwan aron maniobrahon ang kinatibuk-ang recording pagsegurong makumbinser si Dickey nga gi-doktoran kini?

* * *

E-mail: [email protected]