Gilas program tuloy lang

MANILA, Philippines — Bigo man ang Gilas Pilipinas na makapasok sa Paris Olympics, hindi ito ang magiging katapusan ng programa ng tropa dahil nagsisimula pa lamang ang lahat.

Nais ni Samahang Basketbol ng Pilipinas president Al Panlilio na manatiling intact ang buong Gilas Pilipinas squad para sa mga susunod na international tournaments na lalahukan nito.

Ayon kay Panlilio, may nabuo nang chemistry ang kasalukuyang Gilas Pilipinas pool kaya’t ito na ang parehong team na isasabak sa malalaking torneo.

Kabilang na rito ang FIBA Asia Cup, FIBA World Cup, SEA Games at Asian Games gayundin ang Olympic qualifying para sa Los Angeles Olympics sa 2028.

“We have great set of guys who also created a brotherhood, bond. The long term plan is to keep this together for upcoming tournaments,” wika ni Panlilio.

Kinapos ang Gilas Pilipinas sa katatapos na FIBA Olympic Qualifying Tournament matapos matalo sa eventual champion Brazil sa semifinals na ginanap sa Riga, Latvia.

Sa kabila ng kabiguan, pinatunayan ng Gilas Pilipinas na kaya nitong makipagsabayan sa mga world class teams kaya’t umani ng paghanga ang Pinoy cagers mula sa iba’t ibang panig ng mundo.

“We fell short but I am very proud of the team. We can compete with the top-ranked teams in the world,” wika ni Panlilio.

Nakakuha ng panalo ang Gilas sa Latvia habang hindi hinayaan ng Pinoy squad na matambakan ito ng Georgia para makahirit ng tiket sa semis.