Apprentice patay, 2 iba pa sugatan sa pagsabog sa barko

MANILA, Philippines — Isang apprentice ang nasawi, habang sugatan naman ang dalawang iba pa, sa naganap na pagsabog sa loob ng isang barko sa Tondo, Manila kamakalawa.

Kinilala ang nasa­wing biktima na si Timothy James Lumagui habang ang mga sugatan naman ay sina Lowie Belen at Alfred de Leon, na kapwa nagtamo ng 3rd degree burns.

Batay sa ulat ng Raxabago Police Station 1 ng Manila Police District (MPD), dakong alas-10:30 ng umaga nang maganap ang insidente sa loob ng 2nd Deck Boson Store Paint Room ng Bow Thruster Engine ng MV Everwin Star-II, na nakadaong sa Vitas Pier 18, Mel Lopez Blvd., sa Tondo, ngunit dakong alas-11:20 na ng gabi nang maireport ito sa kanilang tanggapan.

Nauna rito, nakarinig na lamang umano ng isang malakas na pagsabog sa loob ng Vitas Pier 18, kaya’t mabilis na rumes­ponde ang mga duty security ng Philippine Port Authority (PPA) at nakitang mayroon nang nagaganap na sunog sa barko.

Kaagad na inapula ang sunog ngunit nang magsagawa ng ocular inspection ang mga tauhan ng Bureau of Fire Protection (BFP), nadiskubre ang bangkay ng biktima.

Kaagad rin namang isinugod ang mga sugatan sa Jose Reyes Medical Center upang malunasan.

Anang BFP, nagmula ang pagsabog sa engine cabin ng barko.

Inaalam pa umano nila kung ang pagsabog ay dulot ng fumes o pagsingaw ng langis o pintura o di kaya ay ng LPG.

Maaari rin naman umanong ang spark na nag-trigger ng pagsabog ay mula sa activation ng isang hydraulic switch.

Patuloy ang imbestigasyon sa insidente.