Selosang misis binoga ng mister na pulis
![Selosang misis binoga ng mister na pulis](https://media.philstar.com/photos/2024/08/12/1_2024-08-12_22-03-05.jpg)
MANILA, Philippines — Isang 47-anyos na misis ang nasa kritikal na kondisyon matapos na barilin sa ulo ng kanyang mister na pulis Linggo ng gabi sa Quezon City.
Patuloy na inooberahan sa Quezon City General Hospital ang biktima na si alias Analiza, 47, ng Brgy. Bagong Pagasa, Quezon City.
Nasa kustodiya na ng Talipapa Police Station ang suspek na pulis na may ranggong sarhento at nakatalaga sa Manila Police District (MPD), tubong Ilocos Sur at nakatira sa Macaba Compound, Upper Banlat, Brgy. Tandang Sora, QC.
Batay sa report ng Quezon City Police District- Criminal Investigation and Detection Unit (QCPD-CIDU), naganap ang insidente dakong alas-8:30 ng gabi sa bahay ng ama ng suspek sa Barangay Bagong Pagasa, Quezon City.
Nabatid na nagdiriwang ng kaarawan ang ama ng pulis kung saan bisita ang mag-asawa.
Nabatid na sa gitna ng kasiyahan ay may nabasang text message ang biktima sa cellphone umano ng suspect.
Dito umano kinompronta ng misis ang mister na humantong sa mainitang pagtatalo hanggang sa barilin ng pulis ang kanyang misis.
Inihahanda ang kasong isasampa laban sa suspect.
- Latest