P1.5 milyones ang danyos sa sunog sa brgy Basak Lapu-Lapu  

CEBU, Philippines — Mokabat sa P1.5 milyones ang gibanabanang danyos sa nahitabong sunog sa Kausa Urban Poor sa sitio Suba-Masulog sa Barangay Basak, Siyudad sa Lapu-Lapu kagahapon sa udto Marso 11, 2025.

Si Fire Officer 3 Jeffrey Gerodiaz, imbestigador sa Lapu-Lapu City Fire District miingon nga ang maong sunog dali nilang giisa sa second alarm nga maoy hinungdan sa pagtubag    sa ubang kabomberohan.

Dugang pa niya nga nagpadayon karon ang ilang gihimong pakisusi alang sa pagsuta sa panimalay diin nagsugod ang kayo nga giingong gipanag-iya ni Felix Pinote.

Nasayran mokabat sa 15 ka panimay ang naapektuhan sa sunog.

Matud pa ni Gerodiaz nga pulos ginama sa light materials ang mga panimay nga maoy hinungdan nga dali kaayong nakatapon ang kayo ngadto sa uban nga kabalayan.

Si FO3 Gerodiaz miingon ala 1:20 ilang gidklarar nga under control ang kayo ug hingpit kini nilang napawong ala 1:37 ang takna sa hapon.

Hinuon way gikatahung naangol ug nakalas sa maong insidente.

Sa laing bahin gibisita ni Talisay City mayor Gerald Anthony Samsam Gullas ang mga pamilya nga apektado sa sunog didto sa Purok Rambotan, Barangay San Roque.

Giangkon sa mayor nga lisod gyud ang kahimtang sa masunogan nga mawagtang ang tanan nga gihagoan apan ang importante nga luwas ang tanan.

Si Gullas niingon nga ang gobyerno moasistar sa pagbangon sa 28 ka pamilya nga apektado sa sunog.

Ang mayor nimando na sa City Social Welfare and Development (CSWD) pinangulohan ni Coleen Enajada nga matagaan og ayuda ang mga biktima.

Sila ang nipakaon sud sa tulo ka adlaw gikan sa trahedya, pagbutang og mga tent aron katulgan ingon man paghatag sa uban pa nga panginahanglanon.

Nagtinguha si Gullas nga mahatag nila ang pinansyal nga ayuda sa mas dali nga panahon ug iyang ipaniguro nga maatbangan kini sa ayuda gikan sa buhatan ni kongresista Rhea Gullas. (BANAT NEWS)