Inoue mo-away og balik sa Las Vegas

CEBU, Philippines — Ang nabantog nga "Monster" sa Japan nga si Naoya Inoue mowadwad sa iyang abilidad didto sa Las Vegas sa unang higayon sud sa upat ka tuig.

Kini human gipahibawo sa Top Tank ni Bob Arum kagahapong adlawa nga si Inoue gikatakdang makigsinukmagay batok sa Amerikanong si Ramon Cardenas karong Mayo didto sa gibansagan nga Sin City.

Ang 31-anyos nga Inoue modepensa sa iyang trono isip undisputed super bantamweight world champion sa una niyang away gawas sa yuta niyang natawhan sukad niadtong 2021.

Sa miagi niyang pagkatkat sa ring niadtong Enero didto sa Tokyo, si Inoue mipatikangkang sa Koreanong si Kim Ye-joon sud lamang sa upat ka hugna aron inaton ang way pilde niyang rekord ngadto sa 29-0 uban ang 26KOs.

Si Inoue nakapakita'g aksiyon sa Japan sud sa walo ka higayon sukad sa miagi niyang pag-away didto sa Las Vgeas diin iyang gipalukapa ang Pinoy nga si Michael Dasmarinas niadtong Hunyo 2021.

Sunod niyang banggaon ang 29-anyos nga si Cardenas, nga nagtangag og 26-1 nga baraha uban ang 14KOs. Sa labing uwahi niyang sangka niadto lamang miaging bulan, si Cardenas mibuntog sa Meksikanong si Bryan Acosta pinaagi sa unanimous decision.