Gi-bully sa barkada nagmaoy nagpabuto og armas sikop

CEBU, Philippines — Nagtingkagol sa detention cell sa Inayawan Police Station sa Cebu City Police Office ang usa ka 19-anyos nga lalaki nga giingong nagmaoy ug nagpabuto og armas ug nasikop sa kapolisan diha sa Sitio All Season 2, Barangay Cogon Pardo, Siyudad sa Sugbo kagahapon sa buntag.

Ang suspetsado mao si alyas “Junjie”, walay trabaho, nagpuyo sa Sitio Kanipaan, Barangay Basak Pardo niining siyudad.

Base sa imbestigasyon sa kapolisan sa Inayawan Police Station nga ang suspetsado giingong nag-maoy kay gi-bully sa iyahang mga barkada.

Ang suspetsado giingong nagplano kining mobawos hinungdan nga nagdala-dala kini og armas apan wala makita sa suspetsado ang iyahang mga barkada hinungdan nga nag-maoy kini ug nagpabuto sa armas duha ka higayon hinuon walay naigo o naangol sa maong hitabo.

Ang maong insidente girespondehan sa polis nga naka-duty diha sa outpost.

Pag-abot sa polis diha sa lugar naaktohan ang suspetsado nga gadala-dala og armas nga kalibre .38 revolver hinungdan nga gidakop kini.

Nasayran nga ang armas nga gigamit sa suspek giingong sa iyaha kining amahan ug ang kapolisan mopahigayon og imbestigasyon niini sa paghupot og armas sa amahan suspetsado.

Kasong kalapasan sa Akta Republika 10591 kun “Comprehensive Firearms and Ammunition Regulation Act” ug kalapasan sa Comelec Gunban ang ipasaka batok sa suspetsado. BDB BANAT NEWS