Dumanjug nipahugot sa kampaniya batok sa mga armas

CEBU, Philippines — Gipahugtan sa Dumanjug ang kampaniya batok sa mga expired ug wala marehistrong armas samtang gilibkas ni Mayor Efren Guntrano “Gungun” Gica ang cellphone ban sa mga eskwelahan aron masiguro ang komunikasyon sa mga estudyante panahon sa emergency.

Gihatagan ni Gica ang mga tag-iya sa armas og hangtud Agosto 25, 2026 sa alas 5:00 sa hapon aron boluntaryong itugyan sa Dumanjug Municipal Police Station ang ilang expired o dili rehistradong armas.

Gipasidan-an sa mayor nga sugod sa Agosto 26 molihok na ang kapolisan batok sa mga dili motuman sa deadline lakip ang pag-aplay og search warrant ug pagpasaka og tukmang kaso’ng kriminal kong makit-an ang armas.

Matud ni Gica nga ang boluntaryong pagtugyan maoy mas maayong paagi aron malikayan sa mga tag-iya sa armas ang pag-atubang og kaso.

Ang mga armas nga itugyan alang sa safekeeping mahimong ibalik kong makompleto na ang gikinahanglang rehistro ug renewal.

Giklaro sa mayor nga usa sa iyang gikabalak-an mao ang posibilidad nga ma-access sa mga menor de edad ang armas nga anaa sa ilang panimalay o komunidad.

Samtang gipahugtan ang kampaniya batok sa armas, gilibkas usab ni Gica ang kaniadto niyang cellphone ban sulod sa mga eskwelahan sa Lungsod sa Dumanjug tungod sa bag-ohay nga shooting incident sa Zamboanga City.

Bisan og gitugotan na ang mga estudyante nga magdala og cellphone dili kini pasabot nga libre na silang mogamit niini atol sa klase.

Gikinahanglan gihapon nga dili gamiton ang mga cellphone panahon sa instructional hours ug giawhag ang mga magtutudlo nga magbutang og designated storage box.

Si Gica nagkanayon nga mahimong makuha sa estudyante ang ilang cellphone human sa klase o gamiton kini kong adunay emerhensiya. Dili gihapon kini angay’ng gamiton atol sa recess ug lunch kong walay emergency.

Gibutyag ni Gica nga aduna na sila’y mga safety initiative sa wala pa mahitabo ang shooting sa Zamboanga.

Lakip niini ang mga drill sa public ug private schools nga gipasiugdahan sa PNP ug Municipal Disaster Risk Reduction and Management Office. (BANAT NEWS)