Suspek sa ‘chop-chop’ Binondo drum murder, arestado

MANILA, Philippines — Nadakip kahapon ng mga tauhan ng Pasay City Police ang isang 64-anyos na lalaki na sangkot umano sa kaso ng “pag-chop-chop” sa isang lalaki na inilagay sa drum bago ipinatapon sa mga basurero sa Binondo, Maynila, kamakailan.

Sa ulat mula kay Pasay City Police Station (CPS) chief, P/Colonel Joselito De Sesto, madaling araw nitong Miyerkules nang madakip ang suspek na si alyas “Victor” matapos ang intelligence gathering, pakikipag-ugnayan sa Highway Patrol Group (HPG) at Manila Police District (MPD).

Sinabi ni De Sesto na kasabwat ang nadakip na si alyas Victor na siyang nagbiyahe ng drum patungo sa Binondo, Maynila.

Matatandaang ang bangkay sa drum ay nadiskubre alas-7:30 ng gabi noong Pebrero 15, 2026 nang ireport ng concerned citizens na inabandona sa Mel Lopez Boulevard, Barangay 275, Zone 3, Binondo, Maynila.

Lumalabas sa imbestigasyon na ang biktima ay isang Chinese national habang ang utak sa krimen na may-ari ng van na minaneho ni alyas Victor ay isa ring Chinese.

Nakita sa footage ang isang mistulang lalaking Chinese habang nagpapatulong sa security guard ng condominium sa pagtulak ng drum mula sa ika-15 palapag.

Pinuntahan na rin ng mga awtoridad ang unit na pinangyarihan ng krimen na hinihinalang sa banyo isinagawa ang pagkatay, habang ang pananaksak ay sa kama, dahil sa mga naiwang ­talsik ng dugo sa headboard at mga dugo sa unan.

Sa banyo ay natag­puan ang maraming mga iba’t ibang condiments na ibinuhos umano sa kinatay na katawan na isinilid sa drum upang hindi umalingasaw.