Renewal ng driver’s license ng OFWs online, target sa Agosto

MANILA, Philippines — Target ng Department of Migrant Workers (DMW) at Land Transportation Office (LTO) na sa susunod na dalawang buwan ay maitupad na nila ang programa na magpapahintulot sa mga overseas Filipino wor­kers (OFWs) na mag-renew ng kanilang driver’s license online.

Ayon kay DMW Secretary Hans Leo Cacdac, layunin ng inisyatiba na maputol na ang red tape sa proseso ng pagre-renew ng driver’s license ng mga OFWs.

Sa ilalim nito, hindi na kakailanganin pa ng mga OFWs na umuwi ng Pilipinas upang makapag-renew ng lisensiya.

Sinabi pa ng DMW chief na ang mga detalye ng proyekto ay isasagawa pa nina LTO Asec. Vigor Mendoza. Target aniya nilang maipatupad ito sa loob ng isa hanggang dalawang buwan.