Bantag, Roque tugis ng bagong CIDG chief
Matapos maaresto si Quiboloy
MANILA, Philippines — Matapos ang matagumpay na paghahanap at pag-aresto kay Kingdom of Jesus Christ (KOJC) Leader Pastor Apollo Quiboloy, sinabi naman ng bagong talagang hepe ng Philippine National Police (PNP)-Criminal Investigation and Detection Group (CIDG) na si Brig. Gen. Nicolas Torre III na handa siyang tugisin sina dating presidential spokesperson Harry Roque at si dating Bureau of Correction chief Gerald Bantag.
Si Roque ay may arrest order mula sa House of Representatives dahil sa pagbalewala nito sa imbitasyon ng Kamara sa isinasagawang imbestigasyon sa POGO.
Habang nahaharap naman sa kasong murder si Bantag kaugnay ng pamamaslang sa broadcaster na si Percy Lapid.
Ayon kay Torre, naghihintay lamang siya ng “go signal” mula kay PNP chief Gen. Rommel Francisco Marbil upang mapag-aralan ang pag-aresto kina Roque at Bantag.
Binigyan diin ni Torre na tungkulin ng PNP na papanagutin sa batas ang sinumang may sala.
Tiniyak din nito ang kanilang gagawing manhunt ay legal.
Matatandaang si Torre ang nanguna sa operasyon ng paghahanap kay Quiboloy kung saan nasukol ang KOJC leader sa loob mismo ng KOJC compound.
- Latest
