Pinoy abroad, pwede na mag-renew ng lisensya online
MANILA, Philippines — Maaari nang mag-renew ng kanilang driver’s license sa online ang mga Pinoy na nasa abroad.
Ito ay makaraang ilunsad ng Land Transportation Office (LTO) at Department of Migrant Workers (DMW) ang programa na magpa-facilitate sa renewal ng driver’s license para sa mga overseas Filipino workers (OFWs) na nakatira o nagtatrabaho sa ibang bansa.
Ayon kay LTO chief Vigor Mendoza, ang programa na “Pinabilis sa Bagong Bayani ang Magkalisensya” (LTO PBBM Project) ay layong mapabilis ang proseso para sa online renewal ng driver’s license ng mga OFWs.
Aniya, ang LTO PBBM Project ay resulta ng pag-uusap sa pagitan ni Dept. of Transportation (DOTr) Secretary Jaime J. Bautista at Dept. of Migrant Workers (DMW) Sec. Hans Leo Cacdac.
Sinabi ni Mendoza na hindi na kailangan gumastos at umuwi ng Pilipinas ang mga Pinoy abroad para mag-renew ng driver’s license sa Pilipinas dahil maaari nang isagawa ang transaksyon ng pagre-renew ng lisensya sa pamamagitan ng online application.
“This is also aimed at aligning with global trends in e-governance and modernizing government services by offering online license renewal, reflecting a commitment to digital transformation,” sabi pa ni Mendoza.
Pinasalamatan naman ni Cacdac ang DOTr at LTO sa paghahanap ng paraan na mabigyan ng mas mabilis na serbisyo ang mga Filipino migrant workers.
- Latest
