MANILA, Philippines — Nagsagawa ng clearing operations nitong Lunes, ang mga tauhan ng Metropolitan Manila Development Authority (MMDA) sa mga nakabarang karinderya o kainan at ibang pasaway sa bangketa at sa Mabuhay Lanes na gamit bilang alternatibong ruta kaugnay sa isinarang lanes sa EDSA-Kamuning flyover.
Inalis ng MMDA ang mga sagabal at sa kanto ng Sgt. Esguerra Avenue, Scout Madrinan at Kamuning Road. Ang mga kalyeng ito ay bahagi ng mga alternatibong ruta para sa pagsasara ng flyover.
Nilinis din ng mga tauhan ng MMDA Special Operations Group, Strike Force ang kalsada ng mga iligal na nakaparadang mga pribadong sasakyan, taxi, at tricycle habang giniba ang mga iligal na istruktura sa tabi ng mga bangketa.
Nanguna sa mga operasyon sina MMDA General Manager Usec. Procopio Lipana, MMDA Assistant General Manager for Operations Asec. David Angelo Vargas, Traffic Discipline Office (TDO) Director for Enforcement Atty. Vic Nuñez, Sidewalk Clearing Operations Group (SCOG) head Director Francisco Martinez, at SOG-SF Officer-in-Charge Gabriel Go .
Bandang alas-10:00 ng umaga nang umabot na sa 17 ang nahuli at nabigyan ng ticket, habang limang sasakyan ang na-tow. Nakita rin ang mga nagbalikan na mga kainan na omukupa sa mga bangketa kaya pinangbubuwag.
Bunsod nito, nagbabala ang MMDA na kanilang aaraw-arawin ang pinaigting na clearing operations sa nasabing mga lugar.