Driver ng SUV sa Valenzuela road rage lumantad na
MANILA, Philippines — Lumantad na ang driver ng SUV na nagkasa ng baril sa isang taxi driver sa isa pang insidente ng road rage na naganap sa Valenzuela City noong Agosto 19.
Sa pahayag ni Marlon Malabute, lumantad na siya upang isuko ang kanyang baril. Isasailalim ito sa ballistic test ng Valenzuela City police.
Si Malabute ang driver ng Toyota Fortuner na may plakang NBB 3135 na nakairingan ng isang taxi driver. Nakunan ng dash cam ang panyayari kung saan nakita si Malabute na kinuha ang baril sa kanyang sasakyan at saka ikinasa sa nakaengkuwentrong taxi driver.
Hindi pa naite-turn over ang sasakyan nito sa LTO sa kabila ng inilabas na show cause order.
Ayon kay kay Malabute sa korte na lamang niya sasagutin ang mga reklamong isasampa sa kanya. Sa ngayon aniya, wala pa naman silang natatanggap na reklamo.
Lunes nang sinabi ng Valenzuela police na kinasuhan na ng grave threats at alarm and scandal si Malabute sa piskalya.
Kasama ni Malabute na humarap ang kanyang legal counsel na si Atty. Elisa Barquez kung saan tumanggi itong ikuwento ang pangyayari.
Sinabi naman ni Valenzuela City Mayor Wes Gatchalian na hindi kinukunsinti sa Valenzuela ang anumang uri ng karahasan. Mahigpit na pinaiiral ang batas. Walang puwang ang siga.
Dahil sa ganitong uri ng insidente, nagdagdag ang LGU ng 1,500 LED lights at 250 CCTV sa mga secondary road.
- Latest
