MRT may libreng sakay sa mga kababaihan
Ngayong National Women’s Day
MANILA, Philippines — May handog na libreng sakay ang pamunuan ng Metro Rail Transit Line 3 (MRT-3) para sa mga kababaihang pasahero ngayong Martes, March 8 kaugnay ng pagdiriwang ng National Women’s Day.
Libreng makakasakay ang mga babaeng pasahero simula alas-7 hanggang alas-9 ng umaga at mula alas-5 ng hapon hanggang alas-7 ng gabi.
Ayon kay MRT-3 OIC-General Manager Asec. Eymard D. Eje, ang libreng sakay para sa mga kababaihan ay pagkilala sa kanilang natatangi at hindi matatawarang kontribusyon sa lipunan.
“Kaisa po ng buong bansa ang pamunuan ng MRT-3 sa pagdiriwang at pagsaludo sa dedikasyon, galing, at puso ng bawat kababaihang Pilipino,” ani Asec. Eje.
Sinabi ni Eje na sa simpleng paraan tulad ng libreng sakay ay makapaghatid ang ahensya ng kasiyahan sa ating mga kababaihan sa kanilang espesyal na araw.
- Latest
