Libreng sakay ng MRT-3, LRT-1 sa Independence Day

MANILA, Philippines — Magbibigay ng libreng sakay ang Metro Rail Transit Line 3 (MRT-3) at Light Rail Transit Line 1 (LRT-1) sa nalalapit na pagdiriwang ng Independence Day sa Hunyo 12.

Batay sa inisyung paabiso ng Department of Transportation (DOTr), nabatid na ang libreng sakay ng MRT-3 ay maaaring i-avail ng kanilang mga commuters sa pagitan ng alas- 7:00- 9:00 ng umaga  at alas- 5:00 ng hapon hanggang alas-7:00 ng gabi.

 “Sa darating na ika-12 ng Hunyo 2019, magbibigay ng libreng sakay ang DOTr sa MRT-3 bilang pakikiisa ng ahensya sa paggunita ng ika-121 anibersaryo ng proklamasyon ng Araw ng Kasarinlan ng Pilipinas,” bahagi ng anunsyo ng DOTr.

Samantala, kinumpirma na rin naman ni LRT-1 Corporate Communications head na si Rochelle Gamboa na magpapatupad din sila ng libreng sakay sa kahalintulad na oras para sa kanilang mga pasahero sa Araw ng Kalayaan.

Habang wala pa namang anunsiyo ang LRT-2 kung magbibigay din sila ng free ride sa kanilang commuters bilang pakikiisa sa naturang mahalagang okasyon.