Truck salpok sa dyip: 7 sugatan

MANILA, Philippines - Pito katao ang sugatan nang salpukin ng isang 14 -wheeler truck at isang pampasaherong jeepney sa Quezon Avenue, sa lungsod kahapon ng hapon.

Ayon sa ulat, ang mga biktima ay pawang nagtamo ng mga galos, at sugat sa kanilang mga katawan at agad na nilapatan ng lunas ng rumespondeng rescue team, habang ang iba ay itinakbo sa East Avenue Medical Center.

Nangyari ang insidente sa may kahabaan ng naturang Avenue, malapit sa Delta, ganap na ala-1:30 ng hapon.

Ayon sa driver ng PUJ (PWN-773)  na si William Aurelio, kahihinto lamang umano niya sa lugar para magbaba ng pasahero nang biglang tumbukin ang tagilirang bahagi ng kanyang jeepney ng nasabing truck na minamaneho ni Domingo Muhi.

Sa lakas ng impact, nagpaikut-ikot ang PUJ saka sumampa sa center island, bago huminto. 

Ang resulta, lima sa mga pasahero ng PUJ ang sugatan na agad namang itinakbo sa ospital, habang ang driver na si Aurelio at Muhi na sugatan din ay agad na nilapatan ng lunas.