Upang maibangon ang Maynila Erap luluhod, makikiusap at manlilimos

MANILA, Philippines - Handa umanong lumuhod, makiusap at manlimos si Manila Mayor Joseph Estrada kaninuman maibangon lamang ang lungsod mula sa kahirapan, krimen at korupsyon.

Sa kanyang kauna-una­hang press confenrence kahapon matapos ang oathta­king sa session hall sa harap ni dating Senate President Juan Ponce Enrile,  sinabi ni  Estrada  na gagawin nila ni Vice Mayor Isko Moreno ang lahat upang  maiahon ang mga mahihirap na Manileyo gayundin upang masawata ang katiwalian na kadalasang kinasasangkutan ng mga opisyal ng  city hall at mga pulis.

Bagama’t hindi siya ‘superman’, naniniwala si  Es­trada na sa tulong ng  konseho ng  Maynila at mga pulis ay unti-unting maiaahon ang lungsod mula sa masasamang imahe at  pagkabaon nito sa utang. Dahil dito, nanawagan din si Estrada sa mga Manilenyo na dagdagan ang kanilang pagtitiis, sakripisyo at pang-unawa.

Kabilang sa programa    ng administrasyong Estrada ay ang peace and order, edukasyon, kabuhayan at pagtatanggal ng mga baha. Aniya, ang mahihirap ay hindi kinokotongan  bagkus ay tinutulungan.

Tiniyak din ni Estrada na magiging transparent ang lahat ng sistema sa pangongolekta ng buwis, gayundin ang  pagpapalabas ng pondo upang makita kung tama ang pinaggagamitan nito.

Inihayag din ni Estrada ang ilang pagbabago sa kanyang mga opisyal kung saan  sinabi nito na magiging Manila Police District  director si  Sr. Supt. Isagani  Genabe; MPD-Chief Directorial Staff si  Sr. Supt. Gilbert Cruz; MPD- Directorial for Administration si  Sr. Supt. Ronald Estilles at  MPD- Directorial for Operations si Supt. Joel Coronel; Secretary to the Mayor si Atty. Ed Sarafio; City Administrator si dating Nueva Ecija congressman Simeon Garcia;  City Legal Officer si Atty. Jay Flaminiano at ibinalik naman si Liberty Toledo bilang  hepe ng  Treasurer’s Office.