Ang yugo

Sa wala pa ang teknolohiya sa mga traktora ang atong mga katiguwangan kaniadto nigamit og mga kabaw ug baka diha sa pagdaro.

Samtang ang baka o kabaw magguyod sa daro aron pagtikad sa yuta o uma. Sa laing bahin, ang baka o kabaw ang tauran og yugo dapit sa iyang abaga o liog aron mas dali niini ang pagguyod sa daro.

Ang tag-iya maoy mogiya niini sa likod samtang hinay ug tanos nga molakaw ang maong baka o kabaw diha sa uma.

Ang Napulo ka Sugo sama usa ka yugo nga gitaud sa Dios sa atong tagsatagsa ka mga abaga. Kining maong paghulagway nga ang gibug-aton sa balaod mag-agad sa paagi nga gidala kini nato diha sa tagsa tagsa nato ka mga kinabuhi. Ang Dios maoy nigiiya kanato sa uma sa kalibutan nga mahimong matisokan og mga maayong mga butang ug mga kasinatian kun atong tugotan nga ang balaod sa Dios nga maoy motumpag sa mga babag sa atong espirituhanong paglambo.

Sa laing bahin, ang yugo nagpasabot man usab og responsibilidad. Dili paigo ang pagdawat sa balaod ug kabubut-on sa Dios kondili nagkinahanglan usab kini usa ka makanunayong tinguha ug paningkamot aron tumanon ang matag balaod dili tungod kay napugos kita kondili tungod kay atong gihigugma ang Dios nga maoy tinubdan ning tanan.

Ang pagsunod sa balaod nga pinasikad sa paghigugma, mamahimong gaan ug dili bug-at ang pagtuman niini kay anaa man ang paghigugma.

Hinuon atong hinumdoman nga ang pinakamahinungdanong sugo gikan sa Dios mao man ang paghigugma sa Dios labaw sa tanan ug ang paghigugma sa atong isigkaingon sama sa atong kaugalingon.

Dugang pa ang si bisan kinsa nga dili mahigugma sa tawo nga makita, pakyas diha sa pangangkon nga nahigugma siya Dios nga dili makita.