Baha

Hinay nga uwan dako nga lunop ug baha ang atong makita ug nakita.

Ang lunop ug baha wala lang nato masinati dinhi sa Sugbo kun dili nasinati usab kini lukop nasud ug nakabalda sa panginabuhi sa matag usa kanato.

Tungod sa kanunay nga paglunop ug pagbaha bisan sa hinay nga pag-uwan mora’g mihinay-hinay na sa pagdawat ang katawhan sa lunop ug baha.

Gani si Presidente Bongbong Marcos Jr. na mismo ang miingon nga ang lunop ug baha mao na karon ang new normal.

Kun atong dawaton nga ang lunop ug baha mao na ang new normal, dili seguro normal ang atong nakita nga ang naglunop ug nagbaha mao na ang basura.

Sakto ang tigpamaba ni Presidente Bongbong Marcos Jr. nga si Atty. Claire Castro nga miingon nga dili lang ang gobiyerno ang mabasol sa naglunop ug nagbaha nga basura kun dili mabasol usab niini ang katawhan.

Tinuod, ang basura mugna sa mga tawo ug dili kini maanod sa tubig kun wala pa kini ipaanod sa mga tawo nga wala maghuna-huna kun unsa ang epekto sa dili pagtarong sa paghipos ug paglabay sa basura.

Nadugangan na karon ang suliran sa gobiyerno mahitungod sa lunop ug baha kay dili na lamang tubig ang naglunop ug nagbaha, miapil na usab niini ang basura.

Walay bisan unsang matang sa inprastraktura nga tukuron sa gobiyerno ang makasulbad sa suliran sa baha kun magpabilin nga dili disiplinado ang mga tawo.

Aron madisiplina ang mga tawo gikinahanglan sa gobiyerno ang tig-a nga pagpatuman niini sa balaud sa basura ug sa pagmugna og dugang pang balaud nga magpataas sa silot kriminal niadtong magpasagad lang sa paglabay sa ilang mga basura.