Napugos og ipon

Dear Tito Miguel,

Ako diay si Reno John, taga Barangay Labangon, Cebu City.  Nag-ipon nami og puyo sa akong girlfriend nga si  Charice sulod na sa tulo ka tuig tungod kay naa nami anak. Yes, napugos ra gyud ko og uban niya kay nagka-anak mi.  Maong napamabdosan nako siya kaniadto  kay nadala rapud ko sa temptasyon, kay nag-una una man siya. Dili mi uyab kaniadto, apan nagkasalo mi sa kombate sa kama human ko niya gitintal. Hangtod nga nagbunga gyud ang among binuhatan. Kay napamabdosan man, automatic nauyab nalang pud nako. Tungod sa pressure sa among mga ginikanan,  napugos gyud mi nga mag-ipon. Paet man diay kaayo nga mag-uban sa babaye nga dili nimo love uy. Sa tinud-anay lang, ang akong anak ra gyud ang akong pinangga ug wala'y labot ang  inahan. Unsa ang  angay nakong buhaton aron makaikyas ko niining sitwasyona? Klarohon lang nako, andam rako mosustento sa bata. - Reno John -

Reno John,

Isulti imong tinuod nga gibati sa imong kapuyo. Dako ang purohan nga siya makalitan, masakitan, mohilak, mangaway o mangamuyo kanimo. Mao nga wa ka kahibawo unsaon nimo’g biya. Aron dili ka maglisod ug siya dili makalitan, pananghid nga mouli sa ka sa inyo usa ka semana lang, sultihi nga kinahanglan ka’g me-time aron sa pagmoni-moni sa inyong kaugmaon. Sa maong paagi makahibawo ka sa imong tinuod nga gibati. Ka’y basin diay napul-an lang ka, kinahanglan lang ka’g space nga makaginhawa, unya kalit lang ka makaamgo gimingaw ka niya. Kun imong gibati mora ka’g nahuwasan o nakalingkawas, malipayon ka’g dili mingawon niya, buot pasabot wala gyud nimo siya higugmaa. Balik niya ug diha na nimo isulti ang tinuod. Posible makalitan gihapon, apan dili na tanto. Ang mga babaye hait na’g instinct, sa imong pagpananghid primero makamatikod na to nga duna’y dili mao. Pero posible gihapon masuko, mangaway o mangamuyo. Ayaw na padala ana, ka’y dili ba namroblema ka karon kay wala mo kabalibad sa pressure sa inyog ginikanan? Natural kun siya masakitan, apan dili ka makalingkawas kun dili na nimo atubangon. Isulti niya ang tanan, nga ang pagmahal niya imong gisuwayan, apan wala kini padulngan. Siyempre, imong ipasalig nga ang bata dili nimo pasagdan. Wala ka kahibalo, hasta siya kanimo wala gyud diay nagmahal. Timan-i, nagsugod mo sa paghilawas nga dili uyab. Basin sa biga o physical attraction ra to taman. Unya karon nihupas na ang tanan. -Tito Miguel-Magpatambag ka? Ipada kang Tito Miguel: 0991-318-9366