Makigkita gihapon sa ex

Dear Tito Miguel ,

Ako diay  si Christopher John , taga Mabolo , Cebu City ,duha ka tuig nami nga  nag-ipon sa akong  present girlfriend nga si Jessa Mae, ug duna  nami usa ka anak. Love gyud nako ang akong uyab . Apan sa tinud-anay lang , dunay mga higayon nga ganahan ko makiglaag sa akong akong ex nga gay. Wala hinoun mi nagbalik , apan magkita mi usahay apan amo ra gyud ning gihilom kay sure ko malain gyud akong uyab kun mosaba ko nga magkita mi sa akong ex nga gay.  Wala nami feelings sa usag-usa sa ex nako apan ganahan lang ko makigkita niya usahay kay siya ang akong maistoryahan kun duna mi problema sa akong present girlfriend . Sa tinud-anay lang , mag-istorya ra gyud mi ug wala mi buhaton nga lain pang butang . Naa pu'y uyab ang akong ex , gani mas  guwapo pa nako . Kini akong gibuhat karon ba, matawag ba kini nga pagluib? Angay na ba kini nga undangon? — Christopher John

* * *

Christopher John,

Kun tinuod nga wala na mo’y gibati sa usa’g usa, dili kini matang sa pagluib. Kana kun sigurado ka sa imong gibati. Apan sigurado ka nga pareha mo’g gibati sa imong ex nga gay? Basin nagdahom siya nga mabalik inyong  kagahapon. Maski wala pa’y malisya inyong pagkita, dili gihapon maayong  tan-awon. Gani, inyong gitago sa inyong tagsa tagsa ka uyab ang inyong panagkita. Buot pasabot dili mo sigurado sa inyong gibuhat ug baruganan. Hadlok mo makahibawo sila, labi na ikaw. Angay ninyo respetaran inyong tagsa tagsa nga karelasyon karon.

Busa undanga na kana. Ang tanang binuhatan nga sikreto, buot pasabot dili maayo. Ka’y kun wala pa kay gi-agrabyado nga tawo, nganong  itago man nimo? Kun kinahanglan ka’g ka-istorya, wala na ba ka’y laing higala? Mabaw ra kaayo imong rason. Pero’g mangatarungan ka nga siya ra’y makasabot nimo, basin nalimot ka kinsa ug unsa inyo gi-istoryahan, ang imong ka-relasyon karon. Dili ba kaha siya ang angay nimo istoryahon? Nganong kinahanglan man ang lain nga tawo, ex pa gyud nimo.

Dili solusyon ang pag-istorya sa inyong problema ngadto sa laing tawo. Tingali makatabang, apan kasagaran inay nga makasulbad, samot matalibagbag. Tinuod, mahimo ka mangayo’g tambag sa uban sama sa imong pagdangop nako karon. Apan pamili kinsa imong duolon, ka’y basin imong problema mapun-an na hinuon. Apan yuna ra, kahibawo ba imong uyab karon sa imong kagahapon? Kun wala, dili kinahanglan imong ikumpisal, siguroha lang nga dili na nimo balikan o buhaton sa uban.Mao na’y pagluib. Tito Miguel

Magpatambag ka? Ipada kang Tito Miguel: 0991-318-9366