Napul-an sa uyab

Dear Tito Miguel,

Ako diay si Michelle, taga Consolacion ,Cebu . Tulo ka tuig na diay ang relasyon namo ni  Jayco. Wala btaw ko kasabot , kay dunay panahon nga mapul-an ko sa akong uyab. Seguro ,resulta kini sa among pag-ipon sa usa ka panimalay . Usahay , maka-guilty gyud bitaw ,kay kanang samokan ko usahay sa iyang presensya. Wala man pu'y ko ganahan nga laing tawo . Siya raman gyud ang akong gihigugma apan dili gyud malikayan uy nga saputon ko sa iyang nawong nga walay klarong hinungdan. Unsa ang angayan nakong buhaton?  —Michelle

* * *

Michelle,

Basin dili pa siya ang para kanimo. Kay ang tinuod nga gugma magkadako ug magkalawom samtang molabay ang panahon. Kun ikaw maglagot kaniya ug kun ngano wa ka kasabot, lagmit gipul-an na ka’g gisamokan.  Posible tungod ka’y nag-ipon mo mao nga gisum-olan na ka. Apan diha ka angay magduha duha, kay kun magpakasal mo, samot nga magkuyog mo gikan sa pagmata hangtod sa pagkatulog. Sa laktod, dili siya ang imong forever.

Aron ka makasiguro sa imong gibati niya, suwayi’g uli sa inyo maski usa ra ka semana. Panid-i imong kaugalingon, mingawon ba ka niya, duna ba’y kuwang o kahaw-ang sa imong ilawom ka’y wala siya sa imong kiliran o mora ka’g nahuwasan kay nakalingkawas ka sa iyang presensiya. Diha ka manukad kun unsa imong sunod buhaton. Kun mas gaan imong paminaw nga wala siya, lagmit nagpas-an ka niya dugay na, wa lang ka makamatikod kay lagi duna ka’y gibati para niya. Apan lagmit karon nihupas na.

Kun nahigugma ka, ganahan ka magtan-aw niya maski bag-ong mata, naa pa’y muta ug wala pa’y kaligo. Dili ka kasabot ngano, mao na'y falling in love. Kun nihupas na, sapoton ka sa iyang nawong maski presko kini, siya nanudlay ug nagpahumot. Dili sab ka kasabot ngano, mao na’y falling out of love.   Tito Miguel

Magpatambag ka? Ipada kang Tito Miguel: 0991-318-9366