Nahadlok sa "ghosting"

Dear Tito Miguel,

Maayong adlaw , ako diay si Alwayne, taga Mandaue City. Usa ko ka gay ug nagtrabaho isip usa ka call center agent. Duna ko'y ka-char char karon nga lalaki nga ginganlan ug  Jeff , taga  Brgy. Labangon ,Cebu City .  Kanunay gyud ko kiligon  ni Jeff tungod sa iyang ka-sweet sa akoa.  Nangutana ko niya kun nakauyab ba siya og gay kaniadto . Niana siya nga wala daw,ug puros daw babaye ang iyang nauyab. Ako daw ang first nga gay nga iyang naganahan.  Apan sa tinud-anay lang Tito Miguel , daghan na ang nisulti nako nga daghan na siya og nag-char char nga gay .Matud pa sa akong  source ,mahilig siya og ghosting ,ug dali ra kaayo siya mapul-an sa usa ka tawo  nga iyang ka-char char .Sa tinoud lang , dili baya nawong og kuwarta si Jeff. Wala gyud ko kasuway nga gipangayoan ko niya og kuwarta .Nindot sad baya  siya og trabaho , manager siya  sa usa ka coffee shop. Nahadlok ko sa nadunggan nako nga  istorya , angay na ba ko nga molikay niya ?  Basin maabot ang panahon ba nga mabiktima ko sa ghosting. — Alwayne

* * *

Alwayne,

Kun iyang gilimod apan ang nakaila niya nipamatuod nga daghan na siya’g bayot nga nauyab, namakak siya. Kun iyang gisulti iyang mga karelasyon puro babaye, iyang buot pasabot lalaki siya. Apan nganong niduol man siya’g nagparamdam kanimo? Ganahan sab siya’g lalaki. Kun dili siya bayot, lagmit bisexual. Wala’y klaro, lagmit hasta iyang gusto ug mga plano gubot pa sa lukot.  Nagbaga nga pula nga bandila, labi na gyud sa istorya nga kalit mahanaw siya. Kun dili ka gusto masakitan, likay na lang. Siya ang matang sa tawo nga magduwa duwa lang. Dili seryoso, wala’y pakialam kun kinsa’y masakitan.

Ini’g likay nimo, paniid unsa iya buhaton. Kun dili ka pangitaon, wa gyud siya’y plano kanimo, nagduwa duwa ra. Ka’y wala man ka mokagat, sa lain na sab siya managat. Kun pangitaon ka, sultihi sa rason ngano nagpalayo ka, nga dili ka gusto masakitan. Kun wala’y buhaton ug ipanghimakak ang imong gikahadlokan, dili gyud siya seryoso kanimo. Ok ra siya nga wala ka. Pero kun maninguha’g pasalig kanimo nga sayop imong pagtuo, basin pa seryoso siya. Pero posible sab natandog iyang garbo, kinahanglan iyang ipamatuod nga ganahan ka niya.

Dagha’g posibilidad, diha ra nimo mahibaw-an kun mahitabo na. Ang relasyon sugal, wala’y garantiya nga kini magmalamposon o mapakyas dayon. Kun gukdon ka, mahimo nimo suwayan. Apan ayaw pagdahom labi na’g ikaw kiligon. Andama imong kaugalingon nga mahitabo imong gikahadlokan. Kun mahitabo man, dili kaayo ka masakitan, kahibawo na ka daan ug imo na nga gipangandaman —Tito Miguel

Magpatambag ka? Ipada kang Tito Miguel: 0991-318-9366