7 CA justices, kinasuhan ng Ombudsman sa SC

MANILA, Philippines — Pitong associate justices ng Court of Appeals (CA) ang sinampahan ng kasong ‘gross ignorance of the law’ at ‘conduct prejudicial to the interest of the public’ ni Ombudsman Samuel Martires kahapon sa Judicial Integrity Board (JIB) ng Korte Suprema.

Kabilang sa mga tinukoy na respondents sa kaso sina Associate Justices Louis Acosta, Marlene Gonzalez-Sison, Rex Bernardo Pascual, Mary Charlene Hernandez-Azura, Roberto Quiroz, Rafael Antonio Santos, at Ferdinand Baylon.

Ang pagsasampa ng kaso laban sa kanila ni Martirez ay may kinalaman sa paglalabas nila ng TRO, pabor sa mga lokal na opisyal ng Antique, na nahaharap sa reklamong ‘grave misconduct at abuse of authority.’

Sa joint complaint affidavit ni Martirez, sinabi nito na nabigo ang mga naturang associate justices na sundin ang batas sa pagpapasya sa inihaing petition for certiorari ng ilang pinatawan ng preventive suspension ng Office of the Ombudsman.

Ipinaliwanag ni Martirez na kinakailangang certified true copy ang kopya ng kautusan ng Ombudsman na kinukwestiyon sa CA.

Gayunman, photocopies lamang umano ang ipinasa ng mga naghain ng petisyon.

Sa kabila nito, nagpalabas pa rin umano sila ng TRO laban sa ilang preventive suspension order ng Ombudsman.

Ayon pa kay Martirez, nag-TRO rin ang ilang associate justices kahit pa tapos nang ipatupad ang suspensiyon.

Mayroon din umanong pinagbigyan ng TRO kahit hindi pa naghain ang petitioner ng motion for reconsideration at dumiretso kaagad sa CA.