215 ka sakop sa Kongreso niendorso pag-impeach ni Duterte

CEBU, Philippines — Niabot sa 215 ka miyembro sa House of Representatives ang niendorso aron nga i-impeach o tangtangon sa pwesto si Bise Presidente Sara Duterte.

Ang anak ni Presidente Ferdinand “Bongbong” Marcos, Jr. nga si Ilocos Congressman Sandro Marcos kinsa deputy majority leader ang giingong maoy nangulo sa signature campaign alang sa bag-o ug ika-upat nga impeachment complaint batok kang Duterte.

Apil sa house leaders nga nipirma sa complaint mao sila si Senior Deputy Speaker Dong Gonzales, Majority Leader Mannix Dalipe, Deputy Speaker Jayjay Suarez, Assistant Majority Leader Jay Khonghun, Camiguin Representative JJ Romualdo, Deputy Majority Leader Paolo Ortega, Santa Rosa Representative Dan Fernandez ug Surigao del Norte 2nd  District Representative Ace Barbers. Nunot niini, siyam ka kongresista nga Sugboanon ang niapil pagpirma sa impeach complaint batok kang Duterte.

Ang maong mga kongresista gilangkuban nila ni Eduardo Rama sa Cebu City 2nd district, Ma. Cynthia Chan sa Lapu-Lapu City Lone District ug Emmarie Ouano Dizon sa Mandaue City Lone District. Sa Probinsiya sa Sugbo apil sa nipirma sila si Rhea Gullas sa Cebu Province 1st  district, Edsel Galeos sa 2nd district, Janice Salimbangon sa 4th district, Duke Frasco sa 5th  district, Daphne Lagon sa 6th district ug Peter John Calderon sa 7th  district.

Ang mga magbabalaod nga niduso sa ikaupat nga impeachment complaint batok kang Duterte nitumbok sa “betrayal of public trust” nga kalapasan sa konstitusyon ug ubang krimen nga maoy gibasehan sa pagpalagpot sa katungdanan sa bise presidente.

Ubos sa 1987 Constitution nagkinahanglan lang og 103 ka boto sa mga kongresista aron ma-impeach ang usa ka opisyal. Human sa pagbotar sa kadaghanang miyembro sa House of Representatives pagpa-impeach kang Duterte, ang House Secretary General gimandoan nga i-transmit ang maong impeachment complaint ngadto sa Senado diin kinahanglan og two-third sa Senado o 16 ka senador ang kinahanglan mopirma o mouyon aron hingpit nga matangtang ang bise presidente sa posisyon.

Samtang si Duterte nagkanayon nga lisod mohimo og reaksiyon kon wala pa niya mabasa ang opisyal nga pamahayag kalabot sa maong impeachment batok sa kaniya.

Apan ang igsuon sa bise presidente nga si Kongresista Paolo Duterte nipadayag sa iyang kasuko sa gihimo sa mga kauban niya sa kongreso ug gihulagway nga politika ang hinungdan niini.

Gikataho nga ang bise presidente aduna na kini tulo ka impeachment complaints nga nag-ong-ong tungod sa giingong kwestiyonable nga paggamit sa pundo sa gobiyerno atol sa iyang termino isip kalihim sa Department of Education (DepEd) ug sa iyang mismong buhatan o Office of the Vice President.

Subay niini, si Duterte ang labing unang bise presidente sa nasud nga gitinguhang palagpoton sa katungdanan. (BANAT NEWS)