Mister kinatay ng 2 kapwa magsasaka

PILAR, Sorsogon, Philippines — Karumal-dumal na kamatayan ang sinapit ng isang magsasaka matapos habulin at pagtulungang pagtatagain ng dalawang kapwa magsasaka sa Purok-3, Brgy. Del Rosario, Pilar, Sorsogon kamakalawa ng gabi.

Agarang nasawi dahil sa malalalim na sugat sa iba’t ibang bahagi ng katawan ang biktima na kinilalang si “Noli”, 52-anyos, binata, residente ng naturang lugar. Pinaghahanap na ang tumakas na mga suspek na kinilala namang sina “Smith”, residente ng Brgy. Sacnangan, at Roy, residente ng Brgy.Malbog ng naturang bayan.

Ayon sa mga nakasaksi, dakong alas-6:30 ng gabi, sa hindi malamang dahilan ay nakita na lang na hinahabol ng mga suspek na armado ng itak ang biktima.

Pumasok pa ang biktima sa sari-sari store ng isang nagngangalang “Nida” pero sinundan ng isa sa suspek at pinagtataga sa iba’t ibang bahagi ng katawan na agad nitong ikinamatay.

Mabilis na tumakas ang mga salarin makaraang mapaslang ang biktima.