Kahulogan sa One Cebu, nakita sa Pasigarbo

CEBU, Philippines — Napuno sa hugyaw ug nagkadaiyang kolorete ang Osmeña boulevard sa Dakbayan sa Sugbo kagahapong adlawa, tungod sa pagbalik sa pagpahigayon sa Pasigarbo sa Sugbo.

Dala ang ilang garbo sa ilang mga festivals nga gipuno sa nagkadaiyang props ug mabulukong mga costumes, nipasundayag ang nagkadaiyang mananayaw gikan sa 51 ka mga contingents sa Pasigarbo kagahapon.

Apan taliwala sa kahugyaw o kalingaw, ang audio van sa contingent sa Bisnok Festival sa lungsod sa Dumanjug ang nasunog kagahapong adlawa.

“…the audio van accidentally caught fire and was completely destroyed” pagpahibalo ni Mayor Efren Gungun Gica pinaagi sa iyang Facebook page.

“ I know this is an incredibly difficult setback, especially considering countless hours you invested to make this happen,” sumala pa sa mayor apan ila kining giisip nga hagit nga kinahanglang atubangon ug dili makapahuyang sa ilang determinasyon nga mosalmot sa Pasigarbo.

“Please remember, this accident does not reflect your abilities or the commitment you’ve shown. The most important thing is that everyone is safe,” matud sa Mayor.

Ang audio van kalit nisilaob samtang nagtadlas sa Cebu South Coastal Road sa may habig sa Citi de Mare sa South Road Properties padung unta sa Cebu City alang sa Pasigarbo.

Ang maong trak gipanag-iya ni Alan Quilante nga gimaneho ni Richard Villalas, gibana-banang moabot P600 mil ang danyos sa maong sunog.

Ang kabomberohan nga gipangulohan sa imbestigator FO1 Pedie Canillas padayon pa nihimo sa ilang imbestigasyon sa hinungdan sa pag-ulbo sa sunog.

Bisan wa ilang audio van, ang mga dancers sa Dumanjug mipadayag nga mosayaw gihapon sila bisan megaphone ug ihap ray ilang paminawon. Wala nila igsapayan ang nahitabo sanglit halad kini para sa ilang lungsod ug patron.  Si Cebu City acting Mayor Raymund Garcia nasubo sa nahitabo ug kini mitabang pagpangita og mini-dump truck ug mga audio system para dunay magamit ang Dumanjug.

“Dili lalim nga ang inyong gihaguan og taman maingon ato lang. But, just like what Mayor Gungun Gica said, ‘We will face this challenge together and find a way to move forward as a team,” dugang pa ni Garcia.

 “One Cebu Island are not just words. They are also actions. To Dumanjug and the rest of the Cebu province towns and cities, amo kamong gika-Pasigarbo sa inyong pag-anhi sa siyudad sa Sugbo,” mensahe pa ni Garcia.

Sa pikas bahin, nangunay sa pag-monitor ug pag inspeksyon si Cebu City Police Office(CCPO) Acting City Director Colonel Antinietto Cañete sa tanang dapit nga apil sa Pasigarbo sa Sugbo 2024 nga gipahigayon kagahapon, Domingo, Agosto 25, 2024 sa Cebu City Sports Center.

Tumong sa inspeksyon  aron masiguro ang kaluwasan ingon man seguridad sa mga contingents ug sa mga nanan-aw sa kalihukan.

Sa inspeksyon ni Cañete, gipahimangnoan niya ang mga polis, volunteers ug force multipliers nga nadestino venues ug billeting area nga magbinantayon ug magbaton og respeto sa tanan. 

Atol ning pagsuwat sa balita, padayun pa ang kompetisyon sa mga contingents diha sa Cebu City Sports Center. – Rowena Capistrano, Preciosa L. Bacalso, Decemay Padilla (BANAT NEWS)