EDITORYAL - Sinulog sa CCSC, daghan nalipay

Daghan ang nihangop sa balitang ang Sinulog 2025 anha na ibalik pagpahigayon sa karaan niining venue, ang Cebu City Sports Center inay sa South Road Properties gihapon nga diin duha ka tuig anha kini gihimo bisan sa dayag nga pagsupak sa kadaghanan.

Dili lang ang mga ordinaryong manan-aw ang wala ganahi sa SRP buhaton ang Sinulog, mismo gani ang pipila ka mga opisyales sa Cebu City Hall nagbagulbol tungod kay gawas nga layo sa sentro sa siyudad, tuyuon kaayo para sa tanan.

Timailhan nga daghan ang wala ganahi sa nakalabay nga duha ka Sinulog mao ang wala na pagsalmot sa mga kalungsoran ug component cities sa Cebu Province, kay mismo si Gobernador Gwendolyn Garcia wala makauyon nga sa SRP kini buhaton.

Daghang rason si Garcia, usa na niini ang kakulang sa saktong pasilidad para sa tanan, sa contingents, sa mga manan-aw.

Labaw sa tanan, expose kaayo ang lugar sa tanang elemento gikan sa naglagiting nga kainit sa adlaw ug sa uwan kay duna say dalang dili maayong epekto tungod sa lapok ug magkalisod-lisod ang contingents.

Peligro sa heat stroke ang mga contingents ug mga manan-aw tungod sa kainit sa adlaw, ug peligro sab kun mouwan kay naay risgo sa pagpangilat-kilat ug lapok.  Asa man padung mopasilong ang mga tawo , diha lang sa duha ka mall?

Usa pa, mas maayong dinhi ibalik sa sentro sa siyudad ang Sinulog festival tungod kay mas daghan ang mga negosyanteng mabulahan. Dili lang mga dagkong establisamento kondili hasta pud ang mga ginagmay nga naninda sa kilid-kilid.

Gawas pa niana, mas daghan og kapasilongan gikan sa mga elemento ug mas duol sab sa mga tambalanan kun may emerhensiya.

Ang kalainan lang, mobalik na sab ang labad sa ulo sa kapolisan sa pagbantay tungod kay siguradong magdasok-dasok na sab ang mga tawo sa halos tanang karsada.

Maglabad sab ang ulo sa mga tighipos sa basura tungod kay siguradong daghan sab kaayong basurang pamiyaan ang mga tawo.

Apan kaning tanan dili man magbilin og malungtarong problema, mahipos ra ang basura ug pwede rang pahugtan ang mga guidelines ilabi na sa mga gidili.

Ang importante ang pagbalik sa kasadya sa sentro sa siyudad sama sa kaniadtong mga Sinulog.