Buhisan ang krimen
Atubangan sa hapit kada adlaw nga mga taho sa bag-ong bangis nga mga krimen nga nahimo sa Philippine Offshore Gaming Operators (POGOs) sa nagkalainlaing bahin sa nasud, nakahunahuna og sulbad ang administrasyon ni Presidente Ferdinand Marcos Jr:
• Imbes kandadohan ang POGOs nga kabahin sa nangalisbo nga mga kabilin sa ilang gipulihan nga administrasyon ni kanhi presidente Rodrigo Duterte, mohimo lang sila og kausaban aron nga mabadlong na ang ilegal nga kalihokan sa POGO firms; ug
• Ang kausaban nga nahunahunaan sa administrasyon mao ang dinaliang pag-usab sa ngan sa mga kompaniya.
* * *
Mao nga sa usa ka pamilok, gideklarar sa Philippine Amusement and Gaming Corporation (PAGCOR) nga wala nay POGO. Pero dili sila kandadohan. Ni papahawaon gikan sa ilang nahimutangan. Ni papaulion sa nasud nga gigikanan.
Magpadayon ang ilang operasyon ubos sa bag-ong ngan. Sugod niadtong Oktubre sa niaging tuig, gitawag na sila og Internet Gaming Licensees (IGLs). Bisan way laing kausaban, nideklarar og kadaogan ang PAGCOR batok sa ilegal nga POGOs. Pinaagi sa pagpasalig nga ang IGLs motuman na sa tanang mga lagda ug mobayad na sa tukmang mga buhis.
* * *
Ang problema nga gusto sa PAGCOR nga isalibay lang sa suok gitug-an sa Presidential Anti-Organized Crime Commission (PAOCC):
• Sa 402 ka POGOs nga gilaksian sa PAGCOR og mga lisensiya tungod sa nagkalainlaing kalapasan, apil nang pagpasiugda og scamming, hacking, ug ubang mga krimen, kapin sa gatos ang nagpadayon sa ilegal nilang operasyon; ug
• Sa kapin sa gatos ka ilegal nga POGOs, upat pay ilang nakandadohan tungod sa kakuti sa paghipos og mga ebidensiya ug pagkiha sa mga tigpasiugda.
* * *
Imbes mangayo og pasaylo sa ilang atraso pagpasud sa mga langyaw nga nahimong hulga sa nasudnong seguridad, ang PAGCOR nigamit sa problema sa PAOCC isip depensa sa pagpadayon sa POGOs nga gitawag na og IGLs: Kon i-ban ang POGOs ug IGLs, mas dako ang problema nga sagubangon sa nasud kay mas lisod badlungon ang ilegal nilang operasyon.
Sa laktod nga pagkasulti, ang kinakusgang argumento sa administrasyong Marcos pagdupa sa POGOs nga gitawag na og IGLs mao nga: Kay di man tang kapatuman sa mga balaod batok sa langyawng mga kriminal, ato na lang silang buhisan. [email protected]
- Latest
