Mga numero ni Sara

Labing lisod nga tubagon ni Bise Presidente Sara Duterte sa iyang turno sa pagpresentar og mga ebidensiya ug mga testigo sa pagpadayon sa impeachment trial karong Nobyembre 9 mao ang dakong kalainan sa mga numero sa iyang Statements of Assets, Liabilities and Net worth (SALNs) ug bank accounts.

Dili siyang kalalis sa mga numero kay ang mga dokumento pulos gikan niya: Ang SALNs iyang gipirmahan ug gipa-notaryohan ug gisumiter sa Ombudsman kada tuig; samtang ang bank records gikan sa mga bangko nga iyang gipili ug gisaligan sa iyang kuwarta.

-o0o-

Iyang SALNs sa pagka bise presidente sugod sa 2022 hangtod sa 2025 (nga iyang gisumiter sa Abril 2026) pulos nideklarar og zero cash on hand ug zero cash in bank. Pero ang year-end balances sa iyang bank accounts nagtug-an og mas dagkong numero:

• ?59 milyones sa 2022;

• ?71.38 milyones sa 2023;

• ?22.25 milyones sa 2024; ug

• ?39.09 milyones sa 2025.

-o0o-

Bisan kon gamiton pa ni VP Sara ang depensa nga gisugyot sa iyang abogado nga si Michael Poa, nga ang cash giipon sa column nga “other properties” sa SALNs, apiki gihapon siya:

• Nideklarar siya og ?13 milyones ubos sa other personal properties sa 2022 (menos og ?46 milyones sa iyang year-end balance nga ?59 milyones);

• ?14 milyones sa 2023 (menos og ?57.38 milyones sa year-end balance nga ?71.38 milyones);

• ?21.13 milyones sa 2024 (menos og ?1.37 milyones sa year-end balance nga ?22.25 milyones); ug

• ?29 milyones sa 2025 (menos og ?10.09 milyones sa year-end balance nga ?39.09 milyones).

-o0o-

Mas lisod ang paglalis sa mga numero. Kon pasanginlang Ombudsman nga niusab sa SALNs, kinahanglang mopresentar sa iyang kopya nga lahi og mga numero sa “other personal properties” pero kinahanglang motakdo sa net worth sa SALNs. Kon pasanginlang mga bangko nga nipaburot sa year-end balances, kinahanglang mopakita sa bank statements nga susama og mga numero nga iyang SALNs. Nga:

• Lahi og mga numero sa SALNs nga gisumiter sa Ombudsman ngadto sa Senate impeachment court; pero sa pikas nga bahin kinahanglang

• Motakdo sa mga numero nga gi-report sa mga bangko ngadto sa Anti-Money Laundering Council.