Sabotahe sa kuryente

Tan-awa ra gud ang binuang sa mga kompaniya sa kuryente:

Nagkataas ang listahan sa ilang mga planta nga wala mag-andar pero padayong gibayran sa mga konsumidor;

Duna say mga planta nga nag-andar nga mas gamay ang suplay pero padayong gibayran sa mga konsumidor sa ilang hingpit nga kapasidad;

Niresulta sa brownouts ang kapakyas pagtuman sa mga kontrata uban sa gobyerno nga ni-garantiya og suplay nga mas dako kay sa kinatibuk-an nga panginahanglan sa mga konsumidor; pero

Walay bisan usa nila nga nasilotan bisan sa isog nga mga pasidaan sa gobyerno.

* * *

Palihug basaha ning lista sa kahimtang sa mga planta sa kuryente nga makapasabot nato nganong nag-brownout na sab (kay naibanan og 804.3 megawatts ang suplay sa Sugbo ug Kabisay-an) gahapon, Oktubre 28:

25 ka planta ang nadaot (10 nadaot sa Oktubre, 2 nadaot sukad Septiyembre, 2 nadaot sukad Agosto, 1 nadaot sukad Hunyo, 3 nadaot sukad Mayo, 3 nadaot sukad 2025, 1 nadaot sukad 2024, 2 nadaot sukad 2023, ug 1 nadaot sukad 2021); ug

18 ka planta ang nag-andar pero kuwang sa ilang kapasidad.

* * *

Hinaot mapasabot sa gobyerno ang kalibog natong gagmayng konsumidor:

Unsa may kadaot sa mga planta nga wala maayo sa nangaging katuigan (1 na-aberiya sulod na sa lima ka tuig, 2 na-aberiya sulod na sa tulo ka tuig, 1 na-aberiya sulod na sa duha ka tuig ug 3 na-aberiya sulod na sa usa ka tuig)?

Nganong nisugot man ang gobyerno nga magbayad ang mga konsumidor sa 25 ka planta nga wala mag-andar ug 18 ka planta nga wala na kaabot sa kapasidad?

* * *

Dugang mga pangutana:

Gipaningkamot ba ang pag-ayo, o wala ba tuyoa sa pagguba, ang mga planta sa kuryente kay bayran man gihapon sa mga konsumidor mag-andar man o dili, full capacity man o kuwang?

Klaro man nga nakalapas ang mga kompaniya sa mga kontrata nga nagsugo nila sa paghatag sa tukmang suplay sa kuryente, nganong wala may bisan usa nila nga nasilotan, bisan namultahan na lang?

Unsaon pagpatuman sa Department of Energy ug Energy Regulatory Commission ang mga lagda pagpanalipod sa mga konsumidor nga ang nagrekomendar nila mao ra man sab ang mga tag-iya sa power companies?