Plano ray maayo
Maayo ang kampanya ni Cebu City Mayor Nestor Archival sa paghawan sa daplin sa mga sapa. Isip envrionmentalist, nahibawo siya nga ang pagpalapad ug pagpalawom sa mga sapa maoy labing epektibo nga panagang sa katalagman. Mas maayo g’yud gani nga, sama sa gihimo sa ubang kanasuran nga malampusong nisulbad sa baha, ibalik ang orihinal nga ruta ug gidak-on sa mga sapa sa wala pa mababagi sa mga negosyo ug kabalayan.
Human nangamatay ang 150 ka Sugbuanon tungod sa bagyong Tino sa Nobyembre sa niaging tuig, uwahi na hinuon ang kampanya.
Pero mas maayo na lang nga nauwahi. Kay sa walay himuon. Hinaot nga dili lang kutob sa press release ang City Hall. Nga dunay igong pundo para sa gatosan ka maapektahan nga mga pamilya aron mabalhin ngadto sa mas luwas nga mga lugar.
Ug hinaot nga motinuod g’yud si Mayor Archival, uban ang tabang sa nasudnong mga ahensiya sa gobyerno ug sa pribadong sektor, sa pagtukod og tarong nga relocation sites. Nga puy-an lang sa mga bakwet kon dunay kadalanan, suplay sa tubig ug kuryente ug kahigayonan sa panginabuhi.
May sukaranan hinuon ang kabalaka nga ang kampanya ni Archival walay kalainan sa samang mga kampanya nga gilusad sa nangaging mga mayor. Si kanhi Mayor Mike Rama pananglitan mas abunda ang paukyab kay sa aktuwal nga nahimo sa iyang gubat batok sa baha.
Kay ang puntirya ni Rama, ug hinaot dili kopyahon ni Archival, mao ra ang kabos nga mga molupyo. Nga gihulga og mga kaso ug demolisyon. Pero wala tandoga ang dagkong mga negosyante.
Apil sa nasakpan sa task force ni Rama nga mga istruktura nga nakababag sa sapa mao ang duha ka inilang motels sa syudad. Gipadad-an ang mga tag-iya, nga pulos inila sa Sugbo, og notisya nga nihatag og lugway sa boluntaryo nga pagguba sa ilegal nilang istruktura.
Nasuspenso na lang si Rama, nataktak na lang sa puwesto, napulihan na lang ni Raymond Garcia, napilde na gani silang duha sa niaging eleksiyon, ug kapin sa tuig nang nibanos sa City Hall si Archival, walay nangahas sa pagtandog sa motels ug walay nagtagad sa pagpasidaan nga ikiha ang mga tag-iya.
BLURB:
“Gihulga og mga kaso ug demolisyon ang kabos, pero wala tandoga ang dagkong mga negosyante.”
- Latest

















