Posibleng lusot ni Sara
Human nipasalig si Atty. Michael Poa, kanhi tigpamaba ug nagpabiling abogado ni Bise Presidente Sara Duterte sa impeachment trial, nga dunay klarong katin-awan ang tanang pasangil sa hidden wealth sa prosekusyon, naglumba ang ilang mga dumadapig sa pagpabaha nako pinaagi sa text ug chat messages sa posibleng mga lusot nga makapa-absuwelto sa sinumbong:
• Ang ?2.3 milyones nga suweldo gikan sa Davao City Hall niadtong 2023 dili double compensation kay nalangay kadto niya nga suweldo sa kataposang pagka mayor;
• Ang ?41 milyones nga gi-withdraw ni Atty. Mans Carpio sulod lang sa 73 minutos niadtong Agosto 6, 2024 iyang kuwarta ug walay magbuot unsaon niya pagkuha gikan sa mga bangko; ug
• Ang ?205 mil nga bayad ni VP Sara sa usa lang ka kaon sa Tokyo, Japan, ug kapin ?600 mil nga bayad sa Nike sa Davao ug Malaysia iyang kuwarta ug walay magbuot pilay iyang kan-on ug komprahon.
***
Unahon nato pagtuki ang ?2.3 milyones nga suweldo ni VP Sara sa City Hall. Susama tinuod ang iyang nakobra sa usa ka tuig niyang suweldo pagka mayor.
Pero sa kataposan niyang tuig sa puwesto unom ka buwan ra (Enero hangtod Hunyo sa 2022). Ug kon nalangay sab ang suweldo sa 2021, usa ug tunga ka tuig unta nga suweldo ang iyang nakobra.
***
Isunod nato ang paspas nga pag-encash ni Carpio sa lima ka tseke sa BDO ug Philippine National Bank. Kon lehitimo ang transaksiyon, mas sayon ug mas luwas ang bank transfer sa ?41 milyones.
Kasagarang magdalidali og encash sa mga tseke mao ang mga durugista ug smugglers nga dili ganahang dunay digital trail unsa ka-ilegal ang ilang gigastohan.
***
Ug ang ?205 mil nga kaon ni VP Sara: Tinuod, walay magbuot unsay kan-on ug pilay gastuhon sa usa lang ka panihapon. Hinaot gipaapil og kaon ang iyang mga guwardiya.
Kay maglisod og pasabot sa ilang kaugalingon ang lunod-patay niyang mga dumadapig nga nagsige siya og paletrato taliwala sa nagpuot nga aso nga nikaon og kwek-kwek (?10 kada piraso) ug barbekyu (?25 kada stick). Pero ?205 mil nga balor sa sashimi, sushi, ug unagi diay ang iyang gitukob sa dihang wala nay kamera.
- Latest
