Labing andam si Sara

Sa kinabuhi, nitambag si Bise Presidente Sara Duterte, nagkinahanglan ka og Plan A, Plan B, ug ubang kapilian. Mao nga sa dihang gi-apiki sa administrasyon duha ka tuig ang nilabay, giumol dayon niya ang mosunod nga mga plano:

Plan A: Akusasyon. Gipasanginlan ang Malacañang ug Kongreso nga nagplano sa pagpalagpot niya sa puwesto pinaagi sa impeachment;

***

Plan B: Bugal-bugal. Gibinastosan niyang public hearings sa House Appropriations Committee pinaagi sa pagdumili sa pagpanumpa nga mosulti siya sa tinuod ug pagbalibad sa pagtubag sa kasagaran sa mga pangutana sa mga kongresista.

Plan C: Congressional boycott. Giisnab niya ang nisunod nga budget hearings sa House kay nisentro nang mga pangutana giunsa paggasto ang iyang ?612.5 milyones nga confidential funds sa Office of the Vice President ug Department of Education.

Plan D: Dakdak nga hulga. Dihang nahinayon ang pagpasaka og impeachment complaints batok niya, gipasidan-an niya og bloodbath ang mga kongresista isip prosecutors ug mga senador isip mga huwes.

***

Plan E: Eskirda sa Korte Suprema. Bisan sa pasalig nga atubangon ang tanang mga pasangil, giawhag niya ang Korte Suprema nga gidominahan sa mga mahistrado nga tinudlo sa iyang amahan nga si kanhi presidente Rodrigo Duterte sa pagbasura sa articles of impeachment batok niya.

Plan F: Flaunting. Gipasigarbo niya nga nidaog ang rule of law batok sa pamolitika dihang nigamit ang labawng hukmanan og technicality sa pagbasura nga unconstitutional ang articles of impeachment.

Plan G: Gearing up. Nipadayag og kaandam sa pagpanalipod sa iyang kaugalingon kon banhawon sa administrasyon ang impeachment kapin sa tuig human sa pagpasaka sa orihinal nga articles of impeachment.

***

Plan H. Hapa. Dihang gihimo ang public hearings sa House Justice Committee pagsusi sa bag-ong impeachment complaints, nagpalaban na sab sa Korte Suprema aron ipahunong ang impeachment proceedings sa House ug Senado.

Plan I. Intriga. Dihang walay nakuha nga temporary restraining order, gi-intriga og kudeta ang House (nga napakyas) ug ang Senado (nga nilampos, salamat sa paggawas ni Senador Bato dela Rosa gikan sa iyang gitagoan).

Plan J. Juggling. Dihang napapas ang iyang mayoriya sa Senado, gilusad dayong kampanya pag-dribol sa impeachment trial aron dili kaablihan ang iyang bank accounts.