Paghot sa sayop nga kahoy
Karong nabalhog na si kanhi presidente Rodrigo Duterte sa prisohan sa International Criminal Court (ICC) sa The Hague, ang mga lagda sa ICC ang modumala niya:
Mga huwes sa ICC, dili ang mga mahistrado sa Korte Suprema sa Pilipinas, ang magbuot magpabilin ba sa siya sa prisohan o makagawas ba; ug
Mga huwes sa Pre-Trial Chamber 1 sa ICC, dili ang mga dumadapig ug mga kaatbang ni Duterte sa Pilipinas ug Netherlands, ang mohukom angay bang hatagan og temporaryong kagawasan.
Sa ato pa:
Naapsan na sa mga panghitabo ang kampanya nga ibalik siya sa Pilipinas, maong walay laing mahimo ang mga mahistrado sa Korte Suprema, bisan pa kon 13 sa 15 tinudlo ni Duterte, gawas sa pagbasura sa nag-ung-ong nga mga petisyon; ug
Walay epekto ang mga protesta pabor ug batok ni Duterte sa kadalanan ug sa social media kay ang mga desisyon sa ICC dili ipasikad sa pagsaka o pagkanaog sa popularity ratings sa mga Duterte ug mga Marcos, o sa mga nag-una ug nangiwit sa mga nanagan sa lokal ug nasudnong eleksiyon karong Mayo 12, 2025.
Sayop ang abogado ni Duterte nga si Salvador Medialdea sa pagpasangil sa ICC nga nakigkonsabo sa panggukod ni Presidente Ferdinand Marcos Jr. nilang kanhi presidente Duterte ug Bise Presidente Sara Duterte kay:
Samtang makapabuhi sa dugo sa ilang mga dumadapig ang isog niyang mensahe sa unang pre-trial hearing ni Duterte;
Dili makatabang ang pagtulisok sa institusyon nga mohusay sa mga ebidensiya batok ni Duterte atol sa husay nga para ra sa pag-ila sa sinumbong ug pagbasa sa mga pasangil.
Dili katabang ni Duterte ang pagtakda sa sunod nga husay sa Septiyembre 23, kapin sa tunga sa tuig gikan karon. Kay nagpasabot nga mapriso siya og kapin sa unom ka buwan sa dili pa mahusay ang kalig-on sa mga ebidensiya batok niya (walay sinumbong sa crimes against humanity nga nahatagan sa ICC og interim release).
Kon dili mausab ang kalendaryo sa Senado, makabuylo nang impeachment trial sa bise presidente sa dili pa mapahigayon ang “confirmation of charges hearing” sa amahan. Kana, kon dili maapil ang anak sa lista sa mga sunod nga ipadakop sa ICC.
- Latest
