Baba na ang mopadayag

Buot ni Bise Presidente Sara Duterte nga taposon ni Presidente Marcos ang iyang tibuok termino, dungan ang pag-ingon nga wala siya’y intensyon nga pukanon ang kasamtangang kagamhanan.  Alang sa bise presidente, mas maayo nga makita sa katawhan hangtod sa pagtapos sa termino sa presidente, kon unsa kini ka-walay ulaw.  Haum kining baruganan sa bise presidente sa stratehiya sa usa ka heneral sa dili pagpakgang sa kaaway kon makahimo kini’g sayop. Matud pa bitaw sa usa ka kritiko, “Dili na kinahanglan hagoan pagbutyag ang mga kasaypanan sa presidente.  Siya na mismo ang mopadayag niini matag bukas niya sa iyang bâbâ.”  Madahaan!

Tanan naghatag kaayohan

Alang kang Senador Panfilo Lacson, ang paghugyaw sa katawhan alang kang Senate President Pro Tempore Sherwin Gatchalian sa dihang gihinganlan siya sa presidente atol sa pagpamulong sa naulahi sa Independence Day Celebration, nagpadayag sa pag-uyon sa katawhan sa liderato sa senado ni Gatchalian.  Dili lang unya mahibulong si Lacson kon dili tanan motoo sa iyang pamahayag.  Mismo gani ang politiko, dili na man motoo sa iyang kaugalingon. Matud pa sa akong amigo, “Ang tanan’g senador naghatag man og kaayohan ug kalipay sa katawhan; ang uban sa dihang nahimo sila’ng senador, ug ang uban usab, sa dihang mibiya na sila sa katungdanan.”  Muleeng!

Wala’y pro-Filipino

Matud ni Senator Alan Peter Cayetano ang pakigbisog sa iyang grupo diha sa senado nahisama sa kalisod nga nasinati ni kanhi Senador Benigno “Ninoy” Aquino kinsa gibuno niadtong 1983 nga nakapahimo niini’ng martir.  Dugang pa ni Cayetano, kinahanglan nga padayon silang makigbisog alang sa kagawasan ug kamatuoran.  Inay magkasinabot ug motrabaho alang sa kabulahanan sa katawhan, gigugol hinoon sa atong mga senador ang ilang panahon sa pagpunay’g atake sa usa’g-usa. Mao kana’y giingon nga, “Sa atong senado karon, adunay mga Pro-Cayetano, aduna’y Pro-Gatchalian ug aduna pa gani Pro-BBM; apan wala gayo’y senador nga Pro-Filipino.” Fezteleern!

Sari-sari store

Segun sa Maybank Research, nasayran nga ang mga Pilipino’ng konsumidor midangop na sa mga sari-sari store sa inadlaw nilang panginahanglan gumikan sa nagkamahal nga bili sa palaliton.  Aron ma-budget ang limitadong kita, mi-shift na ang mga konsumidor ngadto sa mga mga tingi o gagmay’ng pakete nga anha mapalit sa sari-sari store.    Komento pa sa akong silingan, “Halos tanan mapalit ug makita nimo sa sari-sari store, gawas sa kalinaw sa hunahuna ug sa tawo nga sige la’g saad nga mobayad sa utang.”  Atala lagee!

Manguwag gani ang wati

Gikataho nga gidakop sa kapolisan ang kanhi Capitol Consultant nga si Byron Garcia pinasikad sa warrant nga giluwatan sa usa ka Mandaue City court tungod sa giingong violation sa Safe Spaces Act o ang gitawag nga “Anti-Bastos” law. Matud pa bitaw sa tigulang namo’ng silingan, nagkanayon, “Ang pagka-bastos sa hunahuna dili lang diay limitado sa mga batan-on kon dili apil gihapon ang mga tigulang.  Hinoon, manguwag man gani ang wati nga yuta ra’y kinaon, ang tawo pa kaha!”  Pagkatoytoy!