Masyadong generous

Dear Dr. Love, 

Magkasintahan pa lang kami ng mister ko ay sobrang matulungin na siya. Minsan, kapag may lumapit na pulubi ay inaabutan niya ng beinte pesos. 

Malaking halaga na iyan noon nang ang karaniwang ibinibigay sa pulubi ay 25 centavos lang.

Ang ugaling ito ay dala niya hanggang ngayong mag-asawa na kami at may mga anak at apo na. 

Retired na kami pareho at umaasa sa pension at kita ng maliit naming tindahan.

Maraming nangungutang sa kanya, na madalas hindi na siya binabayaran. 

Kahit ba limangdaang piso lang ay malaking bagay na sa amin ngunit ipamimigay pa niya. 

Sabi niya, Diyos na ang magsusukli sa amin. 

Buti na lang at maski paano, natutulungan kami financially ng dalawa naming anak na nasa abroad. Paano ko mababago ang ugali ng asawa ko?

Buena

Dear Buena,

May dalawa ka-yong anak na nagtatrabaho abroad at may sustento sila sa inyo. 

Iyan ang sinasabi ng asawa mo na sukli ng Diyos sa tulong na ibininigay niya sa iba.

Huwag mong sawayin ang asawa mo sa paggawa ng mabuti dahil ginagamit siya ng Diyos na pagpalain ang iba.

Wala namang masama sa nakaugalian niyang pagtulong o pag-abot ng suporta sa kapwa. Sa katunayan ay nagiging makabuluhang tulay siya para mapadaloy ang kabutihan ng Diyos sa bawat nangangailangan sa inyong paligid.

Humahanga ako sa kanyang busilak na kalooban.

Huwag ka mangamba para sa inyong kalagayan. 

Dr. Love