Huwag matakot umibig muli

Dear Dr. Love,

Kumusta ka na? Hangad ko na puro pagpapala ng Diyos ang tinatanggap mo sa araw-araw at malayo ka sa kapahamakan at karamdaman.

Magmula nang mabasa ko ang iyong kolum tatlong taon na ang nakararaan, lagi na akong bumibili ng PSNGAYON.

Ako nga pala si Cris, 30-anyos at isang barbero. Nagkahiwalay kami ng aking live-in partner dahil sumama siya sa ibang lalaki. Pero in fairness, nakipag-break muna siya sa akin bago siya sumama sa bago niyang boyfriend at hindi niya ako trinaydor.

Wala akong magawa nang sabihin niya na may iba na siyang mahal. Pinabayaan ko na lang siya dahil kung hindi, hindi rin magiging maganda ang pagsasama namin. Baka traydorin pa niya ako kung hindi ko siya palalayain.

Mag-iisang taon na ang nakararaan pero para pa rin akong may takot manligaw muli kahit may nagugustuhan ako. Pagpayuhan mo ako Dr. Love.

Cris

Dear Cris,

Hindi tayo dapat matakot umibig muli. Kung may nagugustuhan kang ibang babae, bigyan mo ng kalayaan ang iyong puso.

Pero kilatisin mo munang mabuti ang babaeng iyong balak kasamahin dahil talagang masakit mabigo lalo pa’t sa ikalawang pagkakataon.

Maraming matinong babae riyan. Basta’t binibig­yan mo sila ng katapatan, susuklian ka rin ng katapatan.

Dr. Love