Sa kabila ng kapansanan

Dear Dr. Love,

Isang mainit na pagbati sa iyo at sa staff ng PSN. Tawagin mo na lang akong Lily ng Novaliches, Quezon City.

Five years-old pa lang ako nang tama­an ako ng sakit na polio. Since then, luma­ki ako na maliit ang isang binti at pipilay-pilay kung maglakad.

Kahit tampulan ako ng tukso ng aking mga kaklase, tiniis ko ito upang makapag­ta­pos kahit high school man lang.

Hanggang magdalaga ako ay wala akong maraming kaibigan. Ewan ko, sigu­ro’y nagkaroon ako ng inferiority complex.

Hanggang isang araw na kasama akong namamalengke ng aking tiya, may na­kilala akong lalaki. Isang driver na nag­de-deliver ng paninda. Tawagin mo na lang siyang Ro­dil.  Kinausap niya ako at na­ki­pagkilala at ki­nu­ha pa niya ang address ko.

Akala ko’y nagbibiro lang siya pero isang araw ng Linggo ay dinalaw niya ako sa ba­hay. Ipinakilala ko siya sa aking mga ma­gu­lang. Pero pinaalalahanan ako ng mga ma­gulang ko na mag-ingat at baka lokohin lang ako. Sino raw ba ang seser­yoso sa kalaga­yan kong isang pilantod?

Pero naging maginoo si Rodil. Nagkai­bi­gan kami at nagulat ang mga magulang ko nang mamanhikan siya kasama ang kan­yang mga magulang. Sa susunod na buwan ay ikakasal na kami at para lang akong na­na­naginip.

Sumulat ako sa iyo para ang kasay­sa­yan ko’y maging inspirasyon sa iba. Sala­mat sa pagpapaunlak mo sa aking sulat.

Lily

Dear Lily,

Karaniwang tinatanggap kong sulat ay puro problema ang laman. Ang sulat mo’y ka­kaiba dahil napaka-positibo. Sana ma­ra­­mi pang iba ang maglahad ng ganyang ins­­pirational stories para hindi naman pulos su­li­ranin ang nilulutas natin sa ko­lum na ito.

Totoo ang sinabi mo. Maraming taong may kapansanan na nasisiraan ng loob at na­wawalan ng pag-asa sa buhay. May iba nga na winawakasan ang sariling bu­hay na hindi nila dapat gawin. Wika nga, ha­bang nabubuhay ang tao ay laging may pag-asa.

Sana’y magsilbing moral booster ang ka­say­sayan mo sa ibang katulad mo ang kala­gayan. Hinahangad ko rin na nawa’y maging matibay ang pag-iibigan ninyo at relasyon ni Rodil. Pagpalain kayo ng Panginoong Diyos.

Dr. Love